खासदार ओम राजेनिंबाळकर यांची मध्य रेल्वेच्या महाव्यवस्थापकांकडे मागणी
धाराशिव – दिवाळी सणाच्या पार्श्वभूमीवर मध्य रेल्वेकडून सुरू करण्यात आलेल्या मुंबई-लातूर-मुंबई (०११०५/०११०६) द्विसाप्ताहिक विशेष रेल्वेला ढोकी आणि कळंब रोड रेल्वे स्थानकांवर थांबा द्यावा, अशी मागणी खासदार ओमराजे निंबाळकर यांनी मध्य रेल्वेच्या महाव्यवस्थापकांकडे केली आहे.
दिवाळीच्या काळात मुंबई आणि लातूरदरम्यान प्रवास करणाऱ्या प्रवाशांची संख्या मोठ्या प्रमाणात वाढते. ढोकी आणि कळंब रोड परिसरातील हजारो नागरिक रोजगार, शिक्षण, व्यवसाय तसेच अन्य कामांसाठी मुंबई आणि लातूरला ये-जा करतात. मात्र, या विशेष रेल्वेला दोन्ही स्थानकांवर थांबा नसल्यास प्रवाशांची गैरसोय होण्याची शक्यता आहे.
या रेल्वेला ढोकी व कळंब रोड येथे थांबा मिळाल्यास परिसरातील प्रवाशांना मोठा दिलासा मिळेल. तसेच त्यांचा वेळ आणि प्रवासाचा खर्चही वाचणार आहे. दिवाळीतील वाढती प्रवासी गर्दी लक्षात घेऊन रेल्वे प्रशासनाने या मागणीचा सकारात्मक विचार करावा आणि दोन्ही स्थानकांवर तातडीने थांबा मंजूर करावा, अशी विनंती खासदार ओमराजे निंबाळकर यांनी केली आहे.
