महिनाभर सराव केलेल्या गणेश मंडळांना कला सादर करण्यासाठी मिळाला अधिकचा वेळ
धाराशिव – धाराशिवमध्ये गणपती विसर्जन मिरवणुकीदरम्यान गणेश मंडळांना मोठा दिलासा मिळाला. विसर्जन मिरवणुकीत पारंपरिक वाद्य, लेझीम आणि ढोल-ताशांच्या सादरीकरणासाठी मंडळांनी मोठी तयारी केली होती. मात्र, मिरवणुकीला वेळेचं बंधन असल्याचं सांगत पोलिसांनी काही मंडळांना सादरीकरण थांबवण्याचे आदेश दिले.
ऐन मिरवणुकीत सादरीकरण थांबवण्याचे आदेश मिळाल्याने गणेश मंडळांमध्ये नाराजीचं वातावरण निर्माण झालं. कारण, या सादरीकरणासाठी अनेक मंडळांनी तब्बल एक महिन्यापासून सराव केला होता. ढोल-ताशा, लेझीम आणि पारंपरिक वाद्यांच्या तालावर आपलं सादरीकरण करण्यासाठी मंडळांनी मोठी मेहनत घेतली होती.
ही बाब खासदार ओमराजे निंबाळकर यांच्या निदर्शनास आणून दिल्यानंतर त्यांनी थेट पोलीस अधीक्षकांना फोन केला. गणेश मंडळांनी केलेली तयारी आणि पारंपरिक सादरीकरणासाठी त्यांना योग्य वेळ मिळावा, अशी भूमिका त्यांनी मांडली.
त्यानंतर पोलिसांकडून गणेश मंडळांना सादरीकरणासाठी अधिकचा वेळ देण्यात आला. त्यामुळे मंडळांना आपलं नियोजित सादरीकरण पूर्ण करता आलं.
दरम्यान, या संपूर्ण प्रकारानंतर सोशल मीडियावर कार्यकर्त्यांकडून ओम राजेनिंबाळकर यांचे आभार मानणाऱ्या पोस्ट मोठ्या प्रमाणात शेअर करण्यात आल्या. “दरम्यान एक कॉल… प्रॉब्लेम सॉल्व्ह” अशा आशयाच्या पोस्ट शेअर करत कार्यकर्त्यांनी ओमराजेंच्या तत्पर हस्तक्षेपाचं कौतुक केलं.
एकीकडे विसर्जन मिरवणुकीत शिस्त आणि वेळेचं नियोजन महत्त्वाचं असताना, दुसरीकडे महिनाभर सराव करून तयार केलेल्या पारंपरिक कला-सादरीकरणाला वेळ मिळावा, अशी गणेश मंडळांची मागणी होती. ओमराजेंच्या फोननंतर वाढीव वेळ मिळाल्याने गणेश मंडळांमध्ये आनंदाचं वातावरण पहायला मिळालं
