भूम-परंडा-वाशी मतदारसंघात दुष्काळ निवारण कमिटी स्थापन; सामुदायिक विवाह सोहळ्यासह पाणीटंचाई निवारणासाठीही नियोजन
धाराशिव – दुष्काळाच्या झळा सोसणाऱ्या शेतकरी, शेतमजूर आणि आर्थिकदृष्ट्या अडचणीत सापडलेल्या कुटुंबांना दिलासा देण्यासाठी शिवसेनेचे आमदार तथा माजी मंत्री तानाजी सावंत यांनी पुढाकार घेतला आहे. भूम-परंडा-वाशी मतदारसंघात ‘शिवसेना दुष्काळ निवारण कमिटी’ स्थापन करण्यात आली असून, ‘माणुसकीची दिवाळी किट’ वाटप, सर्वधर्मीय सामुदायिक विवाह सोहळा आणि संभाव्य पाणीटंचाईच्या नियोजनासह विविध उपक्रम राबविण्यात येणार आहेत.
दुष्काळामुळे सर्वसामान्य कुटुंबांचे आर्थिक गणित कोलमडले आहे. या पार्श्वभूमीवर भूम, परंडा आणि वाशी या तिन्ही तालुक्यांतील गरजू नागरिकांपर्यंत मदत पोहोचविण्याचे नियोजन करण्यात आले आहे. यासाठी शिवसेना पदाधिकारी, युवासेना आणि महिला आघाडीच्या कार्यकर्त्यांना गावपातळीवर समन्वय साधून मदतकार्य राबविण्याच्या सूचना देण्यात आल्या आहेत.
१ नोव्हेंबरपासून दिवाळी किटचे वाटप
दुष्काळग्रस्त कुटुंबांनाही दिवाळीचा सण आनंदात साजरा करता यावा, या उद्देशाने ‘माणुसकीची दिवाळी किट’ उपक्रम हाती घेण्यात आला आहे. या किटमध्ये पाच किलो साखर, एक किलो तूरडाळ, एक किलो गूळ, एक किलो खाद्यतेल, एक किलो चुरमुरे, अंघोळीचा साबण आणि सुगंधी उटणे यांचा समावेश आहे. या किटचे १ नोव्हेंबरपासून मतदारसंघातील जिल्हा परिषद गट, पंचायत समिती गण आणि नगरपालिका क्षेत्रांत वाटप करण्यात येणार आहे. दिवाळीच्या आदल्या दिवसापर्यंत किट गरजू कुटुंबांपर्यंत पोहोचविण्याचे नियोजन आहे. याशिवाय, दरवर्षीप्रमाणे यंदाही रेशनकार्डधारक कुटुंबांना पाच किलो साखर देण्याचा उपक्रम राबविण्यात येणार असल्याचे सांगण्यात आले.
सामुदायिक विवाह सोहळ्याचे आयोजन
दुष्काळी परिस्थितीत मुला-मुलींच्या विवाहाचा खर्च पेलणे अनेक कुटुंबांसाठी कठीण झाले आहे. ही अडचण लक्षात घेऊन सर्वधर्मीय सामुदायिक विवाह सोहळा आयोजित करण्यात येणार आहे. या सोहळ्याचा संपूर्ण खर्च उचलण्याची घोषणा आमदार तानाजी सावंत यांनी केली असून, इच्छुक वधू-वरांची नोंदणी मोहीमही राबविण्यात येणार आहे.
संभाव्य पाणीटंचाईसाठी पूर्वतयारी
आगामी उन्हाळ्यात निर्माण होऊ शकणाऱ्या पाणीटंचाईचा सामना करण्यासाठी आतापासूनच उपाययोजनांचे नियोजन करण्यावर भर देण्यात येत आहे. फेब्रुवारीपासून पाणीटंचाई तीव्र होण्याची शक्यता गृहीत धरून गावनिहाय परिस्थितीचा आढावा घेणे आणि आवश्यक उपाययोजनांसाठी समन्वय साधणे अपेक्षित आहे.
दुष्काळाच्या काळात नागरिकांना केवळ तात्पुरती मदत न देता त्यांच्या विविध अडचणी सोडविण्यासाठी एकत्रित प्रयत्न करण्याचा या उपक्रमांचा उद्देश आहे. दुष्काळ निवारण कमिटीच्या माध्यमातून तिन्ही तालुक्यांत मदतकार्याची अंमलबजावणी करण्यात येणार आहे.
