धाराशिव – मराठवाडा मुक्ती संग्राम दिनानिमित्त धाराशिवमध्ये पालकमंत्री प्रताप सरनाईक यांच्या हस्ते उद्या ध्वजारोहणाचा कार्यक्रम होणार आहे. मात्र, या ध्वजारोहणाला मराठा आंदोलकांनी विरोध दर्शवल्याने प्रशासनासमोर मोठे आव्हान उभे ठाकले आहे.
आंदोलकांकडून विरोधाची भूमिका घेतली जात असतानाच पालकमंत्री प्रताप सरनाईक यांनी धाराशिवमध्ये मुक्काम न करता सोलापुरात थांबण्याचा निर्णय घेतल्याची माहिती समोर आली आहे. आज सायंकाळी धाराशिवमध्ये येणे अपेक्षित असतानाही मंत्री सरनाईक सोलापुरातच मुक्काम करणार असून, उद्या सकाळी ध्वजारोहणाच्या वेळेपूर्वी ते धाराशिवमध्ये पोहोचणार असल्याचे सांगितले जात आहे.
त्यामुळे मराठा आंदोलकांच्या विरोधाची धास्ती घेतली म्हणूनच मंत्र्यांनी धाराशिवऐवजी सोलापूर गाठले का? असा सवाल आता धाराशिवच्या राजकीय वर्तुळात उपस्थित केला जात आहे. दरम्यान याच पार्श्वभूमीवर जिल्हाधिकारी कार्यालय परिसरात मोठा बंदोबस्त तैनात करण्यात आला असून बॅरिकेट्स बसवण्यात आले असून ध्वजारोहणाच्या ठिकाणी देखील मोठी सुरक्षा तैनात करण्यात येणार असल्याचे बोलले जात आहे. तसेच प्रसार माध्यमांना देखील ओळखपत्राशिवाय वार्तांकनाची परवानगी देणार नसल्याचं जिल्हाधिकारी यांच्यामार्फत सांगण्यात आलं आहे
दरम्यान, उद्याच्या ध्वजारोहण कार्यक्रमाच्या पार्श्वभूमीवर मराठा आंदोलकांच्या भूमिकेकडे सर्वांचे लक्ष लागले असून, मंत्री सरनाईकांच्या हस्ते ध्वजारोहण निर्विघ्नपणे होणार की आंदोलनामुळे कार्यक्रमाला वेगळे वळण मिळणार, याची उत्सुकता वाढली आहे.
