धाराशिव – निवडणुकीच्या तोंडावर धाराशिव शहरातील राजकीय वातावरण चांगलेच ढवळून निघाले आहे. शिवसेना (ठाकरे गट) पक्षाचे माजी नगरसेवक रोहित निंबाळकर यांच्यावर गुरुवारी रात्री एका दुकानात हल्ला झाल्याची धक्कादायक घटना घडली होती. या घटनेने धारशिवच्या राजकारणात एकच खळबळ माजली होती.
दरम्यान या हाणामारी प्रकरणी माजी नगरसेवक रोहित निंबाळकर यांनी दिलेल्या फिर्यादीवरून विजय खेमा राठोड आणि आकाश मधुकर तावडे या दोघांविरुद्ध आनंद नगर पोलीस ठाण्यात विविध कलमांनुसार गुन्हा दाखल करण्यात आला आहे.
मिळालेल्या अधिक माहितीनुसार रोहित निंबाळकर हे एका दुकानात होते. यावेळी विजय खेमा राठोड आणि आकाश मधुकर तावडे हा त्याच्या साथीदारांसह तेथे आला. त्याने आधी दुकान मालकाशी वाद घालण्यास सुरुवात केली आणि त्यानंतर अचानक निंबाळकर यांच्यावर हल्ला चढवत त्यांना मारहाण सुरू केली. या संपूर्ण घटनेचे सीसीटीव्ही फुटेज सोशल मीडियावर व्हायरल झाले होते
हा हल्ला पूर्वनियोजित कट – रोहित निंबाळकर
रोहित निंबाळकर यांनी हा हल्ला ‘पूर्वनियोजित कट’ असल्याचा आरोप केला आहे. यापुढे ते म्हणाले, “मी ज्या दुकानात बसलो होतो, तिथे विजय राठोड आला. त्याने दुकान मालकाशी वाद घातला. मला वाटले की हा त्यांचा वैयक्तिक वाद असेल. मात्र, त्याने अचानक माझ्यावर हल्ला करत मारहाण सुरू केली. माझ्यावर झालेला हल्ला हा कट असून, मी सदर घटने विरोधात पोलीसांकडे तक्रार दिली आहे.”
मात्र ऐन निवडणुकीच्या तोंडावर हा हल्ल्याचा प्रकार घडल्याने धाराशिवकारांमध्ये भीतीचे वातावरण पसरले कायदा सुव्यवस्थेवर गंभीर प्रश्न निर्माण झाला आहे.
