जिल्हाधिकारी यांनी केले विभागनिहाय जबाबदाऱ्यांचे वाटप
धाराशिव – राज्य सरकारने सर्व जिल्ह्यांमध्ये मुख्यमंत्री महिला सशक्तीकरण अभियान सुरू केले आहे.याच अभियानाच्या कार्यक्रमासाठी मुख्यमंत्री एकनाथ शिंदे हे शनिवारी 14 सप्टेंबर रोजी परंडा शहरात येणार आहेत.त्यांच्या उपस्थितीत होणाऱ्या कार्यक्रमाची जय्यत तयारी सुरु आहे.या कार्यक्रमाच्या तयारीचा आढावा जिल्हाधिकारी डॉ.सचिन ओंबासे यांनी आज 10 सप्टेंबर रोजी तहसील कार्यालय, परंडा येथील सभागृहात घेतला.यावेळी जिल्हाधिकारी व अन्य अधिकाऱ्यांनी कार्यक्रम स्थळ, हेलिपॅड आणि पार्किंग व्यवस्थेची पाहणी केली.बैठकीत जिल्हाधिकारी डॉ.ओम्बासे यांनी विभाग प्रमुखांना कार्यक्रमाच्या विविध जबाबदाऱ्या सोपविल्या.
यावेळी बैठकीला जिल्हा परिषदेचे मुख्य कार्यकारी अधिकारी डॉ.मैनाक घोष, जिल्हा पोलिस अधिक्षक संजय जाधव, अतिरिक्त पोलिस अधिक्षक गौहर हसन, निवासी उपजिल्हाधिकारी शोभा जाधव, जिल्हा ग्रामीण विकास यंत्रणेच्या प्रकल्प संचालक प्राजंल शिंदे,कार्यकारी अभियंता एन.व्ही.भंडे,उपविभागीय पोलिस अधिकारी गौरीप्रसाद हिरेमठ,पालकमंत्री यांचे प्रतिनिधी जिल्हा परिषदेचे माजी उपाध्यक्ष धनंजय सावंत यांची प्रमुख उपस्थिती होती.
मुख्यमंत्री महिला सशक्तीकरण अभियान राज्यात राबविण्यात येत आहे.त्याअंतर्गत जिल्हास्तरावर महिला बचत गट संमेलन आयोजीत करुन महिलांना प्रेरित करण्याकरिता अभियांनातंर्गत विविध शासकीय योजना लोकाभिमुख करुन व त्याची अंमलबजावणी गतिमान करण्यासाठी विविध शासकीय योजनांचा लाभ महिलांपर्यत पोहचविणे,महिला बचत गट स्टॉल उभारणे,विविध सरकारी विभाग व महामंडळाच्या योजनांची माहिती स्टॉलच्या माध्यमातून या कार्यक्रमस्थळी लावण्यात येणार आहे.मुख्यमंत्री एकनाथ शिंदे यांच्या प्रमुख उपस्थितीमध्ये कोटला मैदान, परंडा ता.परंडा जि.धाराशिव येथे “मुख्यमंत्री महिला सशक्तीकरण अभियान” कार्यक्रमाचे आयोजन करण्यात आले आहे.
त्यानुसार कार्यक्रमाच्या नियोजनाकरिता जिल्हाधिकारी डॉ.सचिन ओम्बासे यांनी बैठकीत मुख्यमंत्री शिंदे यांच्या उपस्थितीत होणाऱ्या कार्यक्रमाच्या नियोजनाच्या अनुषंगाने विभागनिहाय अधिकाऱ्यांच्या जबाबदाऱ्या निश्चित करण्यात आल्या.
राज्य सरकारने ‘मुख्यमंत्री माझी लाडकी बहीण’ योजना सुरू केलेली आहे. मुख्यमंत्री-माझी लाडकी बहीण योजनेतून आर्थिक लाभ पात्र महिलांच्या बँक खात्यात जमा करणे सुरू आहे.महिला सक्षमीकरणासह त्यांच्या सुरक्षेसाठीही प्राधान्य देण्यात येत आहे.मुख्यमंत्री माझी लाडकी बहीण या योजनेतील महिला लाभार्थी,मुख्यमंत्री युवा कार्य प्रशिक्षण योजनेतील लाभार्थी,तसेच मुख्यमंत्री लाडकी बहीण योजनेच्यअंमलबजावणी संदर्भात उत्कृष्ट कार्य केलेल्या अंगणवाडी सेविकांचा प्रातिनिधीक स्वरूपात मुख्यमंत्री एकनाथ शिंदे व अन्य मान्यवरांच्या हस्ते विशेष सन्मान करण्यात येणार आहे.या कार्यक्रमाला जिल्ह्यातील महिलांची हजारोंच्या संख्येने उपस्थिती राहणार आहे.
