धाराशिव – 15 व्या वित्त आयोगाच्या विकास निधीचे वाटप सर्व जिल्हा परिषद गटांना समानतेने व स्थानिक मागणीनुसार करावे अशी मागणी शिवसेना शिंदे गटाच्या जिल्हा परिषद सदस्यांनी मुख्य कार्यकारी अधिकारी प्रियंवदा महाडदळकर यांच्याकडे केलो आहे. समान निधी वाटप व स्थानिक गरजेनुसार निधीवरून सदस्य आक्रमक झाले आहेत. मनमानी व एकाधिकारशाही विरोधात आवाज उठवला असल्याचे काही जणांचे म्हणणे आहे. हा मुद्दा आगामी काळात पेटणार असुन त्यातच जिल्ह्यातील राजकीय समीकरणे बदलली आहेत.
धाराशिव जिल्हा परिषदेच्या अंतर्गत 15 व्या वित्त आयोगाचा 10 % विकास निधी जिल्हा परिषद सर्वसाधारण सभेमध्ये ठराव घेऊन काही ठराविक गावे किंवा काही विशिष्ट जिल्हा परिषद गटांमध्येच शौचालय बांधकाम व अभ्यासिकेसाठी खर्च करण्याचा निर्णय घेतला असल्याचे समजते, असे निवेदनात म्हणटले आहे.
15 व्या वित्त आयोगाचा निधी हा संपूर्ण जिल्ह्यासाठी प्राप्त होतो आणि त्याचे वाटप हे नैसर्गिक न्यायाच्या तत्त्वानुसार प्रत्येक जिल्हा परिषद गटाला, त्या गटातील लोकसंख्या (दरडोई) आणि क्षेत्रफळ विचारात घेऊन होणे अपेक्षित आहे. केवळ काही ठराविक गटांमध्येच निधी केंद्रित करणे हे इतर गटांतील विकासावर अन्यायकारक ठरेल.
गेली 4 वर्षे जिल्हा परिषदेवर प्रशासक राजवट असल्याने स्थानिक लोकप्रतिनिधींना जनतेच्या समस्या व आवश्यक मागण्या प्रशासनापर्यंत पोहोचविता आल्या नाहीत. परिणामी, अनेक ग्रामीण भागांतील विकास कामे प्रलंबित आहेत. प्रत्येक जिल्हा परिषद गटाचे प्रश्न आणि गरजा भिन्न असतात. कुठे रस्ते, कुठे पिण्याचे पाणी तर कुठे आरोग्य सुविधांची गरज असते. केवळ शौचालय बांधकाम किंवा अभ्यासिका यांसारख्या विशिष्ट कामांसाठीच निधी खर्च करणे संयुक्तिक नाही. त्यामुळे, प्रत्येक गटातील लोकप्रतिनिधींकडून स्थानिक गरजांनुसार कामांचे प्रस्ताव मागवून त्या कामांसाठी निधी उपलब्ध करून देणे ही काळाची गरज आहे.
जिल्हा परिषद सर्वसाधारण सभेतील संबंधित ठरावाचा पुनर्विचार करून, विकास कामांचे नियोजन करताना त्या-त्या गटातील स्थानिक लोकप्रतिनिधींच्या शिफारसी व स्थानिक मागणीचा प्राधान्याने विचार करावा, जेणेकरून जिल्ह्याचा सर्वांगीण व समतोल विकास साधता येईल.
शिवसेना गटनेते विकी चव्हाण यांच्यासह सीमा भैरवनाथ माडजे, सविता विकास तळेकर, अश्विनी उंदरे,विजयमाला मारकड,जयश्री बालाजी काळे,साधना बापूसाहेब अंधारे,वैशाली चंद्रकांत डोके, अमर सुभाष मोरे,अजित भागवत लाकाळ,सुवर्णा सतीश पाटील यांच्या सह्या निवेदनावर आहेत. निवेदनाची प्रत आमदार प्रा डॉ तानाजीराव सावंत यांना दिली आहे.
