धाराशिव – स्थानिक स्वराज्य संस्थांच्या निवडणुकीचे आरक्षण जाहीर होताच इच्छुकांनी गुडघ्याला बाशिंग बांधून मोर्चे बांधणी सुरू केली आहे. याच पार्श्वभूमीवर राजकीय पक्षांमध्ये इन्कामिंग आउटगोइंग तसेच राजीनामा सत्र सुरू झाल्याचे चित्र धाराशिव जिल्ह्यामध्ये सुरू पहायला मिळत आहे.
अशातच आता शरद पवार गटाला धाराशिव मध्ये धक्का असून युवती पदाधिकारीने राजीनामा दिला आहे. श्वेता दुरुगकर यांनी आपल्या धाराशिव जिल्हा युवती जिल्हाध्यक्ष पदाचा राजीनामा सोशल मीडियावर शेयर करत राष्ट्रवादी काँग्रेस शरद पवार गटाला राम-राम केला आहे. पदाचा राजीनामा पक्षश्रेष्ठी तसेच वरिष्ठ पदाधिकारी यांच्याकडे पोहोचतो ना पोहोचेपर्यंत श्वेता दुरुगकर यांनी ठाकरे सेनेत प्रवेश केला. या पक्षप्रवेशामुळे पुन्हा एकदा महाविकास आघाडीमध्ये मित्र पक्षानेच मित्र पक्षाचा पदाधिकारी आपल्या पक्षात घेतल्याने महाविकास आघाडीमध्ये बिघाडी होते की काय अशी राजकीय वर्तुळात चर्चा सुरू झाली आहे.
श्वेता दुरुगकर यांच्या पक्षप्रवेशावेळी धाराशिव चे खासदार, धाराशिव-कळंब मतदार संघाचे आमदार कैलास पाटील, सहसंपर्कप्रमुख मकरंद राजेनिंबाळकर, सोमनाथ गुरव, शामलताई वडणे, रोहित निंबाळकर, तुषार निंबाळकर, दिनेश बंडगर, मनिषा वाघमारे, पंकज पाटील, अभिजित देशमुख, मंगेश निंबाळकर, रवींद्र दुरुगकर, सागर दुरुगकर, प्रतीक निंबाळकर, अभिजीत निंबाळकर, सह्याद्री राजेनिंबाळकर, हर्षद ठवरे, सात्विक दंड नाईक, बंडू आदरकर, गणेश असलेकर, भूषण पलसे, अक्षय फडकुले, संकेत दुरुगकर, सुरज दूरुगकर व शिवसैनिक उपस्थित होते.
