धाराशिव – धाराशिव नगरपालिकेच्या राजकारणात चर्चांना उधाण आले आहे. भाजपच्या वाटेवर असलेल्या ठाकरे सेनेच्या नगरसेवकांच्या पक्षांतराला अचानक ब्रेक लागल्याची चर्चा राजकीय वर्तुळात रंगली आहे. विशेष म्हणजे, पक्षातील एका निष्ठावंत शिलेदाराच्या आक्रमक भूमिकेमुळे फुटीचा डाव उधळल्याची जोरदार चर्चा सुरू आहे.
ठाकरे सेनेचे चार ते पाच नगरसेवक ‘लक्ष्मी दर्शनाच्या’ मोहाने भाजपमध्ये प्रवेश करण्याच्या तयारीत असल्याची चर्चा होती. पक्षांतरासाठी हालचालीही सुरू झाल्याचे बोलले जात होते. मात्र ऐनवेळी या नगरसेवकांनी माघार घेतल्याने घटनेला नाट्यमय वळण प्राप्त झाले
या संपूर्ण घडामोडीत ठाकरे सेनेच्या एका निष्ठावंत शिलेदाराने फुटीर नगरसेवकांना चांगलाच दम भरल्याची चर्चा आहे. पक्ष सोडण्याच्या तयारीत असलेल्या नगरसेवकांना रोखण्यासाठी या शिलेदाराने आक्रमक भूमिका घेतल्याचे सांगितले जात आहे.
‘वाघा’ सारखी डरकाळी फोडत या शिलेदाराने पक्षातील संभाव्य बंडखोरीच ‘हाणून’ पाडल्याची चर्चा आता रंगू लागली आहे. त्यामुळे भाजपच्या गोटात जाण्याच्या तयारीत असलेल्या नगरसेवकांचा ऐनवेळी यू-टर्न झाल्याचे बोलले जात आहे.
नगरपालिकेतील सत्ता समीकरणे बदलण्याच्या तयारीत असतानाच पक्षांतराला लागलेला हा ब्रेक नेमका कुणामुळे? ‘लक्ष्मी दर्शन’ भारी की निष्ठावंताचा दम भारी? याचीच चर्चा सध्या धाराशिवच्या राजकीय वर्तुळात रंगली आहे.
दरम्यान, या संपूर्ण घडामोडीवर संबंधित नगरसेवक किंवा पक्षाच्या नेत्यांकडून अधिकृत भूमिका अद्याप समोर आलेली नाही.
