किलबिल किड्स इंग्लिश स्कूलच्या शैक्षणिक गुणवत्तेची राज्यस्तरावर दखल; १ नोव्हेंबर रोजी पुण्यात पुरस्कार वितरण
धाराशिव – शैक्षणिक क्षेत्रातील उल्लेखनीय कार्याची दखल घेत किलबिल किड्स इंग्लिश स्कूलच्या प्राचार्या ज्योती आघाव यांची राज्यस्तरीय ‘सावित्रीबाई फुले शिक्षण रत्न पुरस्कार २०२६’ साठी निवड झाली आहे. प्राइम टायकून मीडिया, पुणे यांच्या वतीने हा पुरस्कार प्रदान करण्यात येणार आहे.
विद्यार्थ्यांचा सर्वांगीण विकास, शैक्षणिक गुणवत्ता आणि स्पर्धा परीक्षांमधील यश यांसाठी ज्योती आघाव यांनी केलेल्या कार्याची या पुरस्काराच्या माध्यमातून दखल घेण्यात आली आहे. मागील १८ वर्षांपासून शाळेतील विद्यार्थी एमटीएस ऑलिम्पियाड परीक्षा तसेच बारामती येथील डायमंड टॅलेंट सर्च परीक्षेत सहभागी होत असून, या परीक्षांमधील विद्यार्थ्यांच्या यशाचा आलेख समाधानकारक राहिला आहे.
या पुरस्काराबद्दल आनंद व्यक्त करताना प्राचार्या ज्योती आघाव यांनी पुरस्काराचे श्रेय विद्यार्थी, पालक आणि शाळेच्या हितचिंतकांना दिले. विद्यार्थ्यांच्या गुणवत्तेमुळे आणि पालकांनी दाखविलेल्या विश्वासामुळेच हा सन्मान मिळाल्याची भावना त्यांनी व्यक्त केली. विद्यार्थ्यांचा शैक्षणिक विकास आणि त्यांच्यातील विविध कौशल्ये विकसित करण्यासाठी शाळा सातत्याने प्रयत्नशील असल्याचेही त्यांनी नमूद केले.
या पुरस्काराचे वितरण रविवार, दि. १ नोव्हेंबर २०२६ रोजी पुण्यातील पिंपरी-चिंचवड येथील नटसम्राट निळू फुले नाट्यमंदिर येथे मान्यवरांच्या हस्ते होणार आहे. या निवडीमुळे किलबिल किड्स इंग्लिश स्कूलच्या शैक्षणिक क्षेत्रातील कार्याचा गौरव झाला असून, शाळेच्या विद्यार्थी, पालक आणि हितचिंतकांमध्ये आनंदाचे वातावरण आहे.
