१८ वर्षांच्या वर्चस्वाला सुरुंग; महाविकास आघाडीच्या प्रतापसिंह पाटलांनी महायुतीला दिली धोबीपछाड
धाराशिव – मराठवाडा पदवीधर मतदारसंघाच्या निवडणुकीत प्रतापसिंह पाटील यांनी विजय मिळवत राजकीय वर्तुळात खळबळ उडवली आहे. सलग तीन वेळा निवडून आलेल्या सतीश चव्हाण यांना पराभवाचा धक्का देत प्रतापसिंह पाटील यांनी मतदारसंघात नवा राजकीय अध्याय सुरू केला आहे. या निकालामुळे महायुतीला मोठा धक्का बसला असून, महाविकास आघाडीच्या गोटात उत्साहाचे वातावरण आहे.
गेल्या १८ वर्षांपासून मराठवाडा पदवीधर मतदारसंघावर प्रतिनिधित्व करणाऱ्या सतीश चव्हाण यांच्यासमोर प्रतापसिंह पाटील यांनी आव्हान उभे केले होते. अनुभवी उमेदवार विरुद्ध नवखे नेतृत्व, अशी या निवडणुकीची चर्चा होती. मात्र, पदवीधर मतदारांनी प्रतापसिंह पाटील यांच्या बाजूने कौल देत सतीश चव्हाण यांच्या राजकीय वर्चस्वाला धक्का दिला.
या निवडणुकीत राष्ट्रवादी काँग्रेसच्या अजित पवार गटाचे उमेदवार सतीश चव्हाण आणि राष्ट्रवादी काँग्रेसच्या शरदचंद्र पवार गटाचे प्रतापसिंह पाटील यांच्यात थेट लढत झाली. महायुतीची ताकद आणि सतीश चव्हाण यांचा प्रदीर्घ अनुभव असतानाही महाविकास आघाडीने ही लढत जिंकली. त्यामुळे या निकालाची राजकीय वर्तुळात विशेष चर्चा सुरू झाली आहे.
पदवीधर मतदारांनी दिलेला हा कौल केवळ उमेदवारांच्या विजय-पराभवापुरता मर्यादित नसून, मतदारसंघातील राजकीय समीकरणांमध्ये बदल घडवणारा ठरला आहे. १८ वर्षांच्या प्रतिनिधित्वानंतर सतीश चव्हाण यांना पराभवाचा सामना करावा लागल्याने त्यांच्या राजकीय वाटचालीसमोर नवे प्रश्न उभे राहिले आहेत.
प्रतापसिंह पाटील यांच्या विजयामुळे धाराशिव जिल्ह्याच्या राजकीय ताकदीत भर पडली असून, मराठवाड्याच्या राजकारणातही या निकालाचे पडसाद उमटण्याची शक्यता आहे. महायुतीच्या सत्ताबळाला आव्हान देत महाविकास आघाडीने मिळवलेला हा विजय आगामी राजकीय घडामोडींसाठी महत्त्वाचा मानला जात आहे.
