धाराशिव – जिल्ह्यातील भीषण दुष्काळी परिस्थितीमुळे आर्थिक संकटात सापडलेल्या शेतकरी, महिला आणि सर्वसामान्य नागरिकांची सक्तीची कर्जवसुली थांबवावी, अशी मागणी खासदार ओमराजे निंबाळकर यांनी मुख्यमंत्री देवेंद्र फडणवीस यांच्याकडे पत्राद्वारे केली आहे.
मायक्रो फायनान्स कंपन्या आणि खासगी बँकांकडून कर्जवसुलीसाठी धमकावणे, मानसिक त्रास देणे आणि दबाव टाकण्याच्या तक्रारी समोर येत आहेत. त्यामुळे आधीच दुष्काळाच्या संकटात सापडलेल्या नागरिकांच्या अडचणी वाढत आहेत.
या पार्श्वभूमीवर दुष्काळग्रस्त नागरिकांची सक्तीची कर्जवसुली ठरावीक कालावधीसाठी तात्पुरती स्थगित करावी आणि दबाव टाकून वसुली करणाऱ्यांवर कठोर कारवाई करावी, अशी मागणी ओमराजे निंबाळकर यांनी केली आहे. दुष्काळाने आधीच कंबरडे मोडलेल्या शेतकरी आणि सर्वसामान्य नागरिकांना दिलासा देण्यासाठी सरकारने तातडीने निर्णय घ्यावा, अशी अपेक्षा आता व्यक्त होत आहे.
