तिन्ही पंचायत समिती सभापती पदावर शिवसेनेचा भगवा
धाराशिव – भूम, परंडा, आणि वाशी या तिन्ही तालुक्यांच्या पंचायत समित्यांवर आमदार तानाजी सावंत यांचे वर्चस्व कायम राहिले आहे. प्रतिष्ठेच्या मानल्या गेलेल्या या निवडणुकांमध्ये तिन्ही पंचायत समित्यांच्या सभापतीपदी शिवसेनेचे उमेदवार विजयी झाले असून तिन्ही ठिकाणी शिवसेनेचा भगवा फडकला आहे.या निवडणुकीत तानाजी सावंत यांच्या विरोधात राष्ट्रवादी काँग्रेस, भारतीय जनता पार्टीसह इतर पक्ष मैदानात उतरले होते.
मात्र सावंत यांनी या तिन्ही तालुक्यांत पंचायत समित्यांवर निर्विवाद वर्चस्व मिळवत पुन्हा एकदा आपली राजकीय ताकद सिद्ध केली आहे.परंडा पंचायत समितीच्या सभापतीपदी अर्चना जाधव यांची तर उपसभापतीपदी परसु गवारे यांची निवड झाली. भूम पंचायत समितीमध्ये अटीतटीच्या निवडणुकीत पूजा ढगे या सभापतीपदी विजयी झाल्या, तर उपसभापतीपदी वंचित बहुजन आघाडीचे रण बागुल यांची निवड झाली.वाशी पंचायत समितीच्या सभापतीपदी प्रणिता गायकवाड यांची तर उपसभापतीपदी नितीन रणदिवे यांची निवड झाली आहे.
निवड जाहीर होताच कार्यकर्त्यांनी गुलाल उधळत आणि फटाके फोडत मोठ्या उत्साहात जल्लोष साजरा केला. या विजयामुळे भूम, परंडा आणि वाशी या तिन्ही तालुक्यांमध्ये आमदार तानाजी सावंत यांचे वर्चस्व कायम असल्याचे पुन्हा एकदा स्पष्ट झाले आहे.
