धाराशिव – धाराशिव 2.0 वर आम्ही बोलतोय मग त्याला वाचवायला भाजप का पुढाकार घेत आहे? आणि टीआरपीसाठी राणा पाटलांवर बोलायची काय गरज आहे? ते काय ओम राजेनिंबाळकर आहेत का? असा सवाल युवासेना जिल्हाप्रमुख रवी वाघमारे यांनी विचारला आहे.
धाराशिव नगरपरिषदेच्या निवडणुकीवेळी भाजपच्या बाजूने तीन सोशल मीडिया पेजेस वर फेक एक्झिट पोल दाखवल्याने धाराशिवच्या राजकारणात एकच खळबळ माजली आहे. ठाकरे सेनेने आक्रमक होत फेक एक्झिट पोल दाखवणाऱ्यांवर कठोर कारवाई करावी या मागणीसाठी पाठपुरावा केला जात आहे. याबाबत काल गुन्हा नोंद झाला असून पुढील तपास सुरू आहे. याच विषयावर आज ठाकरे सेनेच्या वतीने पत्रकार परिषद घेण्यात आली. पत्रकार परिषदेनंतर भाजपचे प्रवक्ते नितीन भोसले यांनी ठाकरे सेनेचे खासदार ओम राजेनिंबाळकर व आमदार कैलास पाटील यांच्यावर निशाणा साधत टीका केली.
या टीकेला प्रत्युतर देताना वाघमारे म्हणाले की, आम्ही आज पत्रकार परिषद घेतली त्यात थेट प्रश्न केला की यामध्ये आचारसंहिंता भंग केल्यामुळे यांच्यावर कारवाई करावी. यामध्ये वाचवायला भाजपने छूपा पुढाकार घेतला, ते सिद्ध झालं त्यावर तुम्ही बोला. पण तुम्ही ते सगळं सोडलं व आम्हाला टीआरपी साठी राणा पाटलांचं नाव घ्यावं लागतंय हे बोललात. पण आमच्याकडे ओमराजे सारखं नाव असल्यावर आम्हाला दुसऱ्याचं नाव घ्यायची गरज भासेल का? असा सवाल रवी वाघमारे यांनी केला आहे. चुकीचा फेक व्हिडीओ प्रदर्शीत करणाऱ्या फेक लोकांना विचारा की तुमच्यावर ही वेळ का आली? तुमच्यात पहिल्यापासून लढण्यात धमक नव्हती मग असा रडका डाव खेळून तुम्ही काय सिद्ध केलं याच उत्तर भाजपने द्यावं असं आव्हान वाघमारे यांनी केलं आहे.
