नगराध्यक्ष पदाच्या चौरंगी लढतीने धाराशिवच्या राजकारणात रंगत वाढणार
धाराशिव – धाराशिव नगरपालिका निवडणुकीत मोठी राजकीय उलथापालथ झाल्याचं पाहायला मिळालं सर्वसामान्य जनतेसाठी सदैव धडपडणारे आणि जनसामान्यांमध्ये “हक्काचा माणूस” म्हणून ओळखले जाणारे माजी नगराध्यक्ष खलिफा कुरेशी यांच्या पत्नी परविन खलीफा कुरेशी यांनी राष्ट्रवादी काँग्रेस (शरद पवार गट) तर्फे नगराध्यक्षपदासाठी अधिकृत उमेदवारी मिळाली. महाविकास आघाडी मधून बाहेर पडत शरद पवार गट वेगळा लढत असून कुरेशी यांच्या उमेदवारीने निवडणूकीच्या रिंगणात आणखीन रंगत वाढणार असल्याची जोरदार चर्चा सुरू झाली आहे.
खलिफा कुरेशी हे त्यांच्या कार्यशैलीमुळे शहरात एक वेगळी आणि भक्कम ओळख निर्माण करून आहेत. ते केवळ राजकारणी नसून, सर्वसामान्य नागरिकांचे प्रश्न सोडवण्यासाठी तत्पर असणारे, आणि त्यांच्यासाठी अन्यायाविरुद्ध उभे राहणारे व्यक्तिमत्त्व आहे. त्यांच्या या जनसेवेच्या बळावर त्यांनी प्रचंड मोठा जनाधार निर्माण केला आहे. शहरातील विकास कामांच्या जोरावर ते या निवडणुकीमध्ये जनतेसमोर जाणार आहेत.
‘परविन कुरेशी’: जनाधाराचा वारसदार
खलिफा कुरेशी यांच्या याच भक्कम जनाधाराच्या पार्श्वभूमीवर, त्यांच्या पत्नी परविन कुरेशी यांची उमेदवारी अत्यंत महत्त्वपूर्ण ठरते आहे. पक्षाच्या बैठकीत उमेदवारी निश्चित होताच कार्यकर्त्यांमध्ये उत्साहाचे वातावरण निर्माण झाले आहे. ही उमेदवारी म्हणजे जनसेवेचा वारसा घेऊन आलेल्या एका नव्या नेतृत्वाला संधी असल्याचे मानले जात आहे. त्यामुळे कुरेशी यांना मतदार यावेळी देखील संधी देतील अशी चर्चा धाराशिवच्या राजकीय वर्तुळात सुरू आहे
त्यामुळे या निवडणुकीत ‘खलिफा पॅटर्न’ ला जनता किती मोठा प्रतिसाद देते, याकडे संपूर्ण शहराचे लक्ष लागले आहे. प्रचार फेऱ्यांना सुरुवात झाली असून पुढील दोन दिवसांत प्रचाराचा जोर वाढणार असून परविन कुरेशी यांच्या पदरात काय पडतं हे पाहणे उत्सुकतेचे ठरणार आहे.
