पीआरओ टीम ने डान्स व्हिडिओ व्हायरल केला; तो मात्र जिल्हाधिकाऱ्यांच्या अंगाशी आला
धाराशिव – मागील दोन दिवसांपासून राज्यभर चर्चा आहे ती “कलेक्टर साहेबांच्या डान्स” ची. मराठवाड्यावर अतिवृष्टीचे काळेकुट्ट ढग असताना अन् बळीराजाचं सोनं पाण्यात असताना तसेच पुरामुळे काहींचे संसार उघड्यावर पडलेले असताना जिल्हाधिकारी एका कार्यक्रमाचा आनंद घेत असताना स्टेज वर थोडे फार थिरकले आणि थिरकल्याचा व्हिडिओ व्हायरल झाला अन् सर्वत्र गाजावाजा झाला.
प्रसिद्धीची घाई; संकटात नेई
प्रसिद्धीची घाई गडबड कशी अंगलट येते हे धाराशिव जिल्ह्यात घडलेल्या घटनेवरून दिसून आलं. तुळजापूर महोत्सवात जिल्हाधिकारी पुजार यांनी डान्स केला आणि तो डान्स व्हिडिओ व्हायरल देखील झाला मात्र, त्याच काळात जिल्ह्यात अतिवृष्टी, पूर, महापूर शेतीचे प्रचंड नुकसान असे एकूण आसमानी संकट असताना मंदिर संस्थानच्या अध्यक्षांनी त्यांनीच पूर्व पूर्वनियोजित ठरवलेल्या कार्यक्रमात डान्स केला अन् तो अंगाशी आला.जिल्हाधिकाऱ्यांनी एक पी आर ओ टीम नेमल्याची चर्चा आहे. याच टीम ने जिल्हाधिकाऱ्यांचा गाण्यावर ठेका धरेलला एक व्हिडिओ पोस्ट केला होता.
जिल्हाधिकाऱ्यांना यातून प्रसिद्धी मिळेल आणि केलेल्या कामाचा “दाम” वाढवून मिळेल या आशेने पोस्ट केलेला व्हिडिओ जिल्हाधिकाऱ्यांच्याच अंगलट आला. जो कार्यक्रम आणि डान्स लोकांना माहिती नव्हता तो त्या टीम मुळे सर्वांना समजला आणि बघता-बघता व्हिडिओ व्हायरल झाला. पोस्ट केलेला व्हिडिओ अंगाशी आल्याने तो व्हिडिओ नंतर डिलिट करण्यात आला मात्र त्याचे पडसाद राज्यभर उमटू लागले. नंतर जिल्हाधिकाऱ्यांनी दिलगिरीचे पत्र प्रसारित केले मात्र त्यावर अधिकृत सही न्हवती ना ग्राह्य धरला जाईल असा शासकीय उल्लेख देखील न्हवता. त्यानंतर ज्या पी आर ओ टीम ने डान्स चा व्हिडिओ व्हायरल केला होता त्या टीम ने जिल्हाधिकारी कसे बरोबर आहेत हे सांगणारा दुसरा व्हिडिओ बनवून माध्यमांनी कशा चुकीच्या बातम्या बनवल्या हे सांगण्याचा खटाटोप केला.
तरीही जिल्हाधिकाऱ्यांनी केलेला डान्स मात्र जिल्ह्यातील जनतेला आवडला नाही आणि ह्या वादात बळीराजा मात्र दुर्लक्षित राहिला.
