धाराशिव – धाराशिव नगरपालिकेसाठी अत्यंत चुरशीच्या लढती होण्याचे चित्र सध्या धाराशिवच्या राजकारणात निर्माण झाले आहे. महाविकास आघाडी मध्ये फूट पडून शरद पवार गट स्वतंत्रपणे निवडणूक लढणार असल्याची घोषणा केली. नगराध्यक्ष पदासाठी राष्ट्रवादी पक्षाने उमेदवार देखील घोषित केला आहे. तर दुसरीकडे भाजप व शिवसेना (शिंदे गट) हे एकत्र लढणार असल्याचे राजन साळवी यांनी घोषित करत शिवसेनेला भाजपने 17 जागा दिल्याचे सांगितले.
महाविकास आघाडी मधून राष्ट्रवादी शरद पवार गट बाहेर पडल्याने शिवसेना (ठाकरे गट) व काँग्रेस यांची आघाडी होत धाराशिव नगरपालिकेच्या निवडणुकीमध्ये वेगळी आघाडी तयार झाली असून महायुती मध्ये मात्र दुफळी निर्माण झाली आहे. भाजपने शिवसेनेसोबत दगाफटका करत पुरेशा जागा न देता कुरघोडी करण्याचे षडयंत्र सध्या सुरू आहे. यामुळेच धाराशिव मध्ये महायुतीतील दोन घटक पक्ष शिवसेना (शिंदे गट) व राष्ट्रवादी (अजित पवार गट) हे दोघे एकत्र आघाडी करत निवडणुकीच्या मैदानात उतरण्याची दाट शक्यता आहे. शिवसेना व राष्ट्रवादी काँग्रेस पक्षाची युती झाल्यास धाराशिवच्या राजकारणामध्ये आणखी चुरस निर्माण होणार आहे.
