धाराशिव – राष्ट्रवादी शरद पवार गटामध्ये गळतीसत्र सुरू आहे. अनेक नेते शरद पवारांची साथ सोडून जाताना दिसून येत आहे. राज्यात स्थानिक स्वराज्य संस्थेच्या निवडणुकांच्या हालचाली सुरू आहेत.
अशातच आता धाराशिव मध्ये राष्ट्रवादी काँग्रेस शरदचंद्र पवार पक्षाला मोठा धक्का बसण्याची शक्यता आहे. धाराशिव जिल्ह्यातील शरद पवार यांचे निकटवर्तीय असलेला माजी आमदार अजित पवार यांच्या राष्ट्रवादी काँग्रेसमध्ये लवकरच सामील होणार असल्याची चर्चा सुरू आहे. धाराशिव जिल्ह्यातील भूम-परंडा मतदार संघाचे शरद पवारांच्या राष्ट्रवादीचे माजी आमदार राहुल मोटे लवकरच अजित पवार यांच्या राष्ट्रवादी काँग्रेसमध्ये प्रवेश करणार आहेत. राहुल मोटे यांनी 2024 झालेल्या विधानसभा निवडणुकीमध्ये महायुतीचे उमेदवार तानाजी सावंत यांना “तगडी फाईट” दिली होती.
मात्र आता महाविकास आघाडी मधून महायुती मध्ये राहुल मोटे सामील होणार असल्याची भूम-परंडा मतदारसंघामध्ये चर्चा सुरू झाली आहे. नुकतीच मोटे यांनी मतदारसंघातील कार्यकर्त्यांची बैठक घेतली होती. त्यानंतर राहुल मोटे येत्या पाच ऑगस्टला राष्ट्रवादी काँग्रेस अजित पवार गटात प्रवेश करण्याची शक्यता वर्तवली जात आहे. राहुल मोटे यांनी शरद पवारांची साथ सोडत अजित पवार गटात सामील झाले तर शरद पवार यांना मोठा धक्का बसणार असल्याचे बोलले जात आहे.
