धाराशिवची सत्ता कुणाच्या हातात? फैसला अवघ्या काही तासांवर

संगीता गुरव, नेहा काकडे, परवीन कुरेशी की मंजुषा साखरे यांना देतील धाराशिवकर कौल?

धाराशिव – धाराशिव नगरपरिषदेच्या उरलेल्या तीन प्रभागांसाठी आज मतदान पार पडले. या मतदानाचा फैसला उद्या होणार असून धाराशिव च्या नगरपरिषदेवर आपलं वर्चस्व कोण राखणार आहे? हे उद्या स्पष्ट होणार असून संपूर्ण जिल्ह्याचं लक्ष या निवडणुकीकडे लागलेलं आहे.

धाराशिव नगरपरिषदेची निवडणूक ही आता केवळ स्थानिक स्वराज्य संस्थेपुरती मर्यादित राहिलेली नाही. ही निवडणूक थेट खासदार ओम राजेनिंबाळकर आणि आमदार राणाजगजितसिंह पाटील यांची राजकीय प्रतिष्ठा राखणारी ठरणार आहे.एकीकडे जिल्ह्याच्या राजकारणात “OK” पॅटर्नची चर्चा असून या जोडगोळीने सर्वस्वी ताकद लावून धाराशिव नगरपरिषदेसाठी जीवाचं रान करत प्रचाराची धुरा सांभाळली होती. तर एकीकडे शांत संयमी अशी ओळख असलेले आमदार राणाजगजितसिंह पाटील यांनी देखील आपल्या माध्यमातून धाराशिव शहरावर भाजपाचा झेंडा फडकवण्यासाठी नियोजनबद्ध आखणी केली होती. तसेच राष्ट्रवादी शरद पवार गटाकडून जिल्हाध्यक्ष प्रतापसिंह पाटील यांनी देखील जोरदार फिल्डिंग लावत आपल्या नेतृत्वाची प्रतिष्ठा पणाला लावली असून अजित पवार गटाने देखील आपला उमेदवार निवडून आणण्यासाठी ताकदीने मैदानात उतरत प्रचार केला आहे.

धाराशिव नगराध्यक्ष पदासाठी ठाकरे सेना व काँग्रेसच्या आघाडी कडून संगीता गुरव या उमेदवार आहेत तर भाजपकडून नेहा काकडे या उमेदवार असून राष्ट्रवादी शरद पवार गटाकडून परवीन कुरेशी तर अजित पवार गटाकडून मंजुषा साखरे या मैदानात आहेत. या चौघींपैकी धाराशिवकर नगराध्यक्षपदाची माळ कोणाच्या गळ्यात घालतील हे उद्या स्पष्ट होणार असून गेल्या अठरा दिवसांपासून कार्यकर्त्यांची सुरू असलेली आकड्यांची बेरीज उद्या थांबणार असून निकालासाठी अवघ्या काही तासांची प्रतीक्षा सर्वांना करावी लागणार आहे.