धाराशिव – धाराशिव जिल्हा परिषदेच्या आरक्षण सोडतीनंतर अंबेजवळगा जिल्हा परिषद मतदारसंघात स्थानिक उमेदवारांना संधी द्यावी, अशी जोरदार चर्चा सुरु झाली आहे. स्थानिक विकासकामे आणि सामाजिक योगदानाच्या आधारे योग्य उमेदवार निवडण्याबाबत मतदारांमध्ये उत्सुकता वाढली आहे.
या चर्चेत शिंगोली ग्रामपंचायतीच्या विद्यमान सरपंच सौ. योगिता राहुल शिंदे यांचे नाव विशेषतः पुढे येत आहे. ग्रामपंचायतीतील मागील तीन वर्षांतील त्यांचे काम, ग्रामविकासासाठीची धडपड आणि सर्वसमावेशक दृष्टीकोन यामुळे त्यांचा उल्लेख “सशक्त महिला नेतृत्व” म्हणून केला जात आहे.
सौ. योगिता शिंदे या शिंगोलीचे माजी सरपंच हरिश्चंद्र शामराव शिंदे यांच्या नात सून असून, भाजप युवा मोर्चाचे माजी जिल्हा उपाध्यक्ष राहुल भैया शिंदे यांच्या पत्नी आहेत. राहुल शिंदे यांनी गेल्या काही वर्षांपासून अंबेजवळगा परिसरात सामाजिक, शैक्षणिक आणि युवकवर्गाशी संबंधित विविध उपक्रमांतून सक्रिय सहभाग नोंदविला आहे. त्यांच्या जनसंपर्काच्या बळावर आणि संघटन कौशल्यामुळे मतदारसंघात त्यांचा प्रभाव वाढलेला दिसतो.
स्थानिकांमध्ये अशी भावना आहे की, “डॉ.पाटील कुटुंबाप्रती असलेली त्यांच्या तीन पिढ्यांची निष्ठा आणि सातत्यपूर्ण कार्य यावेळी त्यांच्या दाव्याला बळ देतील.”
सामाजिक हिताच्या कार्यात सातत्य ठेवत महिला सक्षमीकरण, ग्रामस्वच्छता, शिक्षणवृद्धी आणि युवक संघटन या क्षेत्रात शिंदे दांपत्याने पुढाकार घेतला आहे. त्यामुळे अंबेजवळगा मतदारसंघातून सौ. योगिता शिंदे यांची दावेदारी प्रबळ ठरत असून, स्थानिकांच्या अपेक्षा आता त्यांच्या दिशेने वळताना दिसत आहेत.
“सामाजिक, शैक्षणिक आणि सर्वसामान्यांच्या हिताचे कार्य हाच आमचा ध्यास आहे,” असे सौ. योगिता शिंदे यांनी एका संवादात सांगितले.
लोकांमध्ये निर्माण झालेला सकारात्मक माहोल पाहता, अंबेजवळगा मतदारसंघातील राजकीय समीकरणांना नव्या दिशा मिळण्याची शक्यता व्यक्त केली जात आहे.
