चार गावठी पिस्टल व तीन जिवंत काडतुसांसह दोघे जेरबंद
धाराशिव – धाराशिव शहरात स्थानिक गुन्हे शाखेने मध्यरात्री धडक कारवाई करत चार गावठी पिस्टल व तीन जिवंत काडतुसांसह दोन आरोपींना जेरबंद केले. या कारवाईमुळे शहरात खळबळ उडाली असून अवैध शस्त्रांच्या हालचालींवर प्रश्नचिन्ह निर्माण झाले आहे.
स्थानिक गुन्हे शाखेच्या पथकाला गुप्त माहिती मिळाली होती की बालाजी बबन काळे (रा. कल्याणनगर, भूम ता. भूम जि. धाराशिव, ह.मु. गोलेगाव पारधी पिडी) आणि आश्रु उर्फ भुऱ्या भिमा काळे (वय 30, रा. जांब ता. भूम जि. धाराशिव) हे मोटरसायकल क्रमांक एमएच 25 एयु 9433 वरून धाराशिव ते बेंबळी मार्गावर जाणार असून त्यांच्याकडे चार गावठी पिस्टल आहेत.
माहिती मिळताच पथकाने वरिष्ठांना कळवून दोन पंचांना सोबत घेत साळुंखे नगर कमानीजवळ सापळा रचला. रात्री अंदाजे ११ वाजण्याच्या सुमारास संशयित मोटरसायकलवरून जात असताना पोलिसांनी त्यांना अडवले. पंचांसमक्ष अंगझडती घेतली असता आरोपींकडून चार लोखंडी गावठी पिस्टल, तीन जिवंत काडतुसे आणि मोटरसायकल असा एकूण २ लाख ९४ हजार ५०० रुपयांचा मुद्देमाल जप्त करण्यात आला.
धाराशिव शहरात एवढ्या मोठ्या प्रमाणात अवैध शस्त्रे सापडल्याने एकच खळबळ उडाली आहे. ही शस्त्रे कोणत्या उद्देशाने आणली जात होती, याचा तपास आता पोलिसांकडून सुरू आहे. आरोपींवर धाराशिव शहर पोलीस ठाण्यात अवैधरित्या शस्त्र बाळगल्याप्रकरणी गुन्हा दाखल करण्यात आला असून पुढील तपास सुरू आहे.
