धाराशिव – शिराढोण येथील एका दुकानातून शेकडो किलो कॉपर वायरची (तांब्याची तार) चोरी करणाऱ्या मुख्य आरोपीला स्थानिक गुन्हे शाखेच्या (एलसीबी) पथकाने वाशी फाटा परिसरातून गुरुवारी (ता. २३) गजाआड केले.या कारवाईत आरोपीकडून १७ किलो कापर वायर आणि गुन्ह्यात वापरलेली टाटा सुमो जीप असा एकूण ३ लाख ७० हजार ४०० रुपयांचा मुद्देमाल जप्त करण्यात आला आहे.
धनाजी बाबुराव पवार (रा. आळणी फाटा, रेल्वे स्टेशनजवळ, जि. धाराशिव) असे अटक करण्यात आलेल्या आरोपीचे नाव आहे. तर त्याचा साथीदार शिवाजी सर्जेराव काळे (रा. अंदोरा, सध्या मु. कन्हेरवाडी पाटी, ता. कळंब) याचा पोलीस शोध घेत आहेत.
याबाबत पोलिसांनी दिलेली अधिक माहिती अशी की, स्थानिक गुन्हे शाखेचे सहाय्यक पोलीस निरीक्षक अमोल मोरे आणि त्यांचे पथक मालमत्तेविषयक गुन्ह्यांची उकल करण्यासाठी गस्तीवर होते. यादरम्यान, शिराढोण पोलीस ठाण्यात दाखल असलेल्या कापर वायर चोरीतील (गु.र.नं. १३/२०२६) आरोपी धनाजी पवार हा चोरीचा माल विकण्यासाठी वाशी फाटा येथे थांबल्याची खात्रीलायक माहिती एका गुप्त बातमीदारामार्फत पथकाला मिळाली.
या माहितीच्या आधारे पोलिसांनी वाशी फाटा परिसरात सापळा रचून धनाजी पवार याला शिताफीने ताब्यात घेतले. त्याला विश्वासात घेऊन सखोल चौकशी केली असता, त्याने आपला साथीदार शिवाजी काळे याच्या मदतीने शिराढोण येथील एका दुकानातून २०० ते २५० किलो कापर वायर चोरल्याची कबुली दिली. ही चोरी करण्यासाठी त्यांनी “एमएच १४ सीएक्स २३७७ या क्रमांकाच्या टाटा सुमो जीपचा वापर केल्याचेही तपासात निष्पन्न झाले. पोलिसांनी आरोपीच्या ताब्यातून १७ किलो कॉपर वायर व गुन्ह्यात वापरलेली जीप हस्तगत केली आहे.
ही धडक कारवाई पोलीस अधीक्षक श्रीमती रितू खोखर, अपर पोलीस अधीक्षक श्रीमती शफकत आमना यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार यांच्या नेतृत्वात, सपोनि अमोल मोरे, पोलीस अंमलदार सचिन खटके, अमोल चव्हाण, बळीराम शिंदे, अमोल निंबाळकर, राहुल नाईकवाडी, महिला पोलीस अंमलदार शोभा बांगर आणि चालक विनायक दहिहंडे यांच्या पथकाने केली. याप्रकरणी शिराढोण पोलीस ठाण्यात पुढील तपास सुरू आहे.
