तुळजापूर – तुळजापूर शहरात एक धक्कादायक घटना उघडकीस आली आहे. शहरातील चित्रा पाटील (वय अंदाजे 65) या महिला 18 जुलैपासून बेपत्ता होत्या. नातेवाईकांनी सर्वत्र शोध घेतला, सोशल मीडियावर पोस्ट्स केल्या, मात्र काहीच ठावठिकाणा लागला नाही. अखेर त्यांनी 19 जुलै रोजी तुळजापूर पोलीस ठाण्यात मिसिंगची तक्रार दाखल केली होती.
या तक्रारीच्या अनुषंगाने पोलिसांनी शोध सुरू केला होता. चौकशीत एका संशयित आरोपी ओम निकम (वय 30, रा. तुळजापूर) याला पोलिसांनी विचारणा केली होती, मात्र सुरुवातीला त्याने कोणतीही माहिती नाकारली होती.
20 जुलैच्या रात्री मोठा खुलासा
20 जुलैच्या रात्री अचानक आरोपी ओंकार निकम स्वतः तुळजापूर पोलीस स्टेशनला हजर झाला व त्याने थेट कबुली दिली की, त्यानेच चित्रा पाटील यांचा खून केला आहे. ही धक्कादायक माहिती मिळताच पोलीस तातडीने घटनास्थळी रवाना झाले.
पुलाखाली सापडला मृतदेह, दोन्ही हात बांधलेले
सोलापूर-धाराशिव बायपास रोडवरील एका पुलाखाली झाडीझुडपात मृतदेह आढळून आला. मृतदेहाची ओळख चित्रा पाटील अशी पटली. ज्यामुळे खून पूर्वनियोजित आणि अत्यंत क्रूरपणे केल्याचा संशय व्यक्त केला जात आहे.
तपासासाठी श्वान पथक व फॉरेन्सिक लॅबची मदत
घटनास्थळी फॉरेन्सिक पथक आणि श्वान पथकास पाचारण करण्यात आले असून, खूनाचा नेमका उद्देश काय होता, हे शोधण्यासाठी तपास अधिक खोलात सुरू आहे. आरोपीने खून का केला, कोणत्या कारणाने इतकी अमानुष कृत्य केली, याचा तपास पोलिस करत आहेत.
पोलीस यंत्रणा सज्ज, आरोपी पोलिसांच्या ताब्यात
या घटनेची माहिती मिळताच उपविभागीय पोलीस अधिकारी डॉ. निलेश देशमुख, पोलीस निरीक्षक अण्णासाहेब मांजरे, सहाय्यक पोलीस निरीक्षक सुरेश नरवडे, पोलीस उपनिरीक्षक अनिल धनुरे, विजय थोटे, हेड कॉन्स्टेबल महादेव राऊत, कॉन्स्टेबल वैभव देशमुख, गोवर्धन माने, सुरज चांदणे आणि उद्धव गिरी यांनी घटनास्थळी धाव घेतली.
पोलीसांनी आरोपी ओंकार निकम याला ताब्यात घेतले असून, पुढील तपास आणि गुन्हा दाखल करण्याची प्रक्रिया सुरू आहे.
ही घटना तुळजापूरकरांमध्ये खळबळ माजवणारी असून, ज्येष्ठ महिलांच्या सुरक्षेचा प्रश्न पुन्हा ऐरणीवर आला आहे.
