सोलापूर – सह-प्रयोजक सेरेंटिका रिन्युएबल्स आणि आयोजक निरझरा केअर फाउंडेशनच्या यांच्या वतीने कै. सिद्धराम साखरे यांच्या स्मरणार्थ व महाराष्ट्र राज्य कुस्तीगीर संघाच्या संयुक्त विद्यमाने ४ थी ‘महिला महाराष्ट्र केसरी’ तसेच वरिष्ठ गट महिला राज्यस्तरीय अजिंक्यपद कुस्ती स्पर्धा – २०२६ चे भव्य आयोजन करण्यात आले आहे. या स्पर्धेसोबतच खुल्या गटातील पुरुष कुस्ती स्पर्धांचाही समावेश करण्यात आला असून, राज्यभरातील नामांकित महिला व पुरुष पैलवानांचा सहभाग अपेक्षित आहे.
ही स्पर्धा २८ ते २९ मार्च २०२६ रोजी सायं. ५ ते ९ या वेळेत सोलापूर येथील हरिभाई देवकरण प्रशाला, होम मैदान परिसरात पार पडणार आहे. महाराष्ट्राच्या समृद्ध कुस्ती परंपरेला उजाळा देणारी ही स्पर्धा ऐतिहासिक ठरणार असून, महिला शक्तीचा भव्य संग्राम पाहायला मिळणार आहे.
कार्यक्रमाचे उद्घाटन ग्रामविकास मंत्री तथा सोलापूरचे पालकमंत्री मा. ना. श्री. जयकुमार गोरे यांच्या हस्ते होणार आहे. यावेळी सार्वजनिक आरोग्य राज्यमंत्री मा. ना. मेघना बोर्डीकर, आमदार मा. श्री. सचिन (दादा) कल्याणशेट्टी यांची प्रमुख उपस्थिती राहणार आहे.
तसेच महाराष्ट्र राज्य कुस्तीगीर संघाचे अध्यक्ष मा. खा. श्री. रामदासजी तडस, उपाध्यक्ष मा. ना. श्री. मुरलीधरजी मोहोळ यांच्यासह अनेक मान्यवरांची उपस्थिती लाभणार आहे. प्रमुख उपस्थितीत राज्यसभा खासदार डॉ. ज्योती वाघमारे, आमदार देवेंद्र कोठे, विजयकुमार देशमुख, सुभाष देशमुख, समाधान आवताडे, दिलीपराव सोपल, नारायण पाटील, उत्तमराव जानकर, तसेच महापौर विनायक कोंड्याल आदींचा समावेश आहे.
स्पर्धेतील विजेत्यांसाठी आकर्षक बक्षिसांची घोषणा करण्यात आली आहे. महिला महाराष्ट्र केसरी विजेत्यास ‘किया सोनेट’ कार, तर उपविजेत्यास ‘बुलेट’ बाईक देण्यात येणार आहे. याशिवाय विविध वजन गटांमध्ये रोख पारितोषिके ठेवण्यात आली असून, प्रथम, द्वितीय, तृतीय व चतुर्थ क्रमांकासाठी अनुक्रमे रोख रक्कम देण्यात येणार आहे.
पुरुष गटातील कुस्ती स्पर्धांमध्ये विविध वजन गटांनुसार ४,००० ते ३०,००० रुपयांपर्यंत बक्षिसे जाहीर करण्यात आली आहेत. ‘वजनाची अट असून वयाची अट नाही’ या निकषावर ही स्पर्धा खेळविण्यात येणार आहे.
हरितऊर्जा निर्मिती मधील अग्रेसर असलेली सेरेंटिका रिन्यूएबल्स ही या स्पर्धेची सहप्रायोजक आहे. ही कंपनी कायमच महिला सक्षमीकरणासाठी प्रयत्नशील असते. कंपनीच्या वतीने नुकतेच महिला दिनाचे औचित्य साधत धाराशिव जिल्ह्यातील २० महिलांना शिलाईचे प्रशिक्षण देवून त्या महिलांना शिलाई मशिनचे वितरणही केले आहे. तसेच महिलांच्या क्रीडा कौशल्याला व्यासपीठ मिळवून देण्यासाठीही छोटासा प्रयत्न कंपनीच्या माध्यमातून करण्यात येत आहे.
