तेरखेडा गटातून विकी चव्हाणच्या नावाची जोरदार चर्चा
जिल्हाधिकाऱ्यांच्या अध्यक्षतेखाली काढली ५५ जिल्हा परिषद गटाची आरक्षण सोडत
धाराशिव – मिनी मंत्रालय म्हणून ओळखल्या जाणाऱ्या जिल्हा परिषदेच्या सार्वत्रिक निवडणुकीसाठी महाराष्ट्र जिल्हा परिषदा आणि पंचायत समित्या नियम २०२५ नुसार धाराशिव येथील जिल्हा परिषदेच्या कै.यशवंतराव चव्हाण सभागृह येथे जिल्हा परिषदेचे निवडणूक विभागनिहाय आरक्षण सोडत चिठ्ठ्या टाकून आयोजित सभेत निश्चित करण्यात आले
धाराशिव जिल्हा परिषद सार्वत्रिक निवडणूकीसाठी एकूण ५५ निवडणूक विभाग आहेत.त्यापैकी ५० टक्के म्हणजे २८ जागा ह्या महिलांसाठी आरक्षित आहेत.यामध्ये अनुसूचित जातीच्या सदस्यांची संख्या ९ असून त्यापैकी ५ जागा ह्या महिला सदस्यांसाठी आरक्षित आहे. अनुसूचित जमातीसाठी १, नागरिकांचा मागास प्रवर्गासाठी एकूण १४ जागा असून त्यापैकी ७ महिलांसाठी आणि सर्वसाधारण प्रवर्गासाठी एकूण ३१ जागा असून त्यापैकी १६ जागा ह्या स्त्री सदस्यांसाठी राखीव आहे.
जिल्हा परिषदेचे आरक्षण जाहीर होताच इच्छुकांनी व त्यांच्या कार्यकर्त्यांनी सोशल मीडियावर आत्तापासूनच “विजयी भव:” “गुलाल आपलाच” “किंगमेकर” अशा सोशल मीडियावर पोस्ट सोडत वातावरण निर्मिती करताना दिसून येत आहेत.
तेरखेडा गट हा सर्वसाधारण गटासाठी राखीव सुटल्याने विकी चव्हाण यांच्या नावाची चर्चा जोर धरू लागली आहे. तेरखेडा गटातून विकी चव्हाण यांना संधी मिळावी अशी त्यांच्या मित्रमंडळींची इच्छा असून त्यांनी आत्तापासूनच सोशल मीडियावर जोरदार धमाका करण्यास सुरुवात केली आहे.
कोण आहे विकी चव्हाण?
तेरखेडा येथील विकी चव्हाण हे सर्व सामान्य घरातील एक व्यक्तिमत्व असून त्यांनी कुस्तीच्या फडात अनेक मल्लांना “आसमान” दाखवले आहे. सर्वसाधारण कार्यकर्ता अशी त्यांची ओळख असताना त्यांनी व्यावसायिक क्षेत्रामध्ये पाऊल ठेवत आपली ओळख निर्माण केली आहे तसेच दोस्तीचा दुनियेतील राजा माणूस म्हणून देखील त्यांची ओळख असून आज त्यांचा मित्रमंडळाचा मोठा वर्ग आहे. तसेच बड्या बड्या राजकीय मंडळींसोबत त्यांची उठ-बस असून त्यांची वेगळी ओळख आहे.
विकी चव्हाण यांना तेरखेडा गटातून संधी मिळाली तर ते राजकीय आखाड्यात देखील निश्चितच विरोधकांना चारी मुंड्या चित करत आसमान दाखवतील अशी आशा त्यांच्या मित्रमंडळी ला असून त्यांनी आत्तापासूनच ताकद लावण्यास सुरुवात केली असून येणाऱ्या काळात अनेक राजकीय घडामोडी घडण्याची शक्यता असून त्या धर्तीवर “राजकीय फटाके” फुटलेले पहायला मिळण्याची शक्यता नाकारता येणार नाही
