धाराशिव – धाराशिवचे खासदार ओम राजेनिंबाळकर यांना भाजपचे तुळजापूर नगराध्यक्ष पदाचे उमेदवार विनोद पिटू गंगणे यांनी अब्रूनुकसानीची नोटीस पाठवली आहे.
तुळजापूर येथील ड्रग्ज तस्करी प्रकरण विधिमंडळ अधिवेशनात गाजत असताना दुसरीकडे खासदार ओम राजेनिंबाळकर यांना ड्रग्ज प्रकरणातील आरोपी तथा भाजपचे तुळजापूर नगराध्यक्ष पदाचे उमेदवार विनोद गंगणे यांनी अब्रूनुकसानीची नोटीस पाठवली आहे. ओमराजे यांनी चुकीचे आरोप केले, त्यामुळे समाजात प्रतिष्ठा मलीन होऊन बदनामी झाली, असे गंगणे यांच्या नोटीसीत म्हटलं आहे. खासदार ओमराजे निंबाळकरांनी सोशल मीडियावरून आरोपांचा व्हिडीओ मागे घ्यावा आणि सार्वजनिक माफी देखील प्रसिद्ध करावी, असंही नोटीसीमध्ये म्हटलं आहे.
तसेच अब्रूनुकसानीच्या भरपाई पोटी 10 कोटी देण्यात यावेत अन्यथा दिवाणी व फौजदारी स्वरूपाची कार्यवाही करू असं म्हटलं आहे. विनोद गंगणे यांनी ॲड. अंगद पवार यांच्यामार्फत खासदार ओम राजेनिंबाळकर यांना ही नोटीस पाठवली आहे. वकील अंगद पवार यांनी खासदार ओम राजेनिंबाळकर यांना पाठवलेल्या नोटीसीत असे म्हटले आहे की, विनोद गंगणे हे तुळजापूर येथील राजकीय प्रतिष्ठित व्यक्ती असून समाजात त्यांना मान आहे. त्यांच्याकडे तुळजापूर शहराच्या राजकारणातील महत्त्वाचा केंद्रबिंदु म्हणुन पाहतात. तामलवाडी येथील गुन्ह्यात त्यांना आरोपी केले आहे. छत्रपती संभाजीनगर उच्च न्यायालयाने त्यांना जामीन देताना काही बाबींचे निरीक्षण केले. त्यात गंगणे हे मादक पदार्थाचे ग्राहक आहेत, त्यांना ड्रग्ज व्यवहारातून आर्थिक लाभ झाला नाही. त्यामुळे ते पेडलर, तस्कर नाहीत. त्यांच्याकडून ड्रग्ज जप्त केले नाही. गंगणे यांनी तपासात केलेले सहकार्य आणि कोणताही गुन्हेगारी पूर्व इतिहास नसल्याची नोंद घेऊन आशिलास जामीन मंजुर केला आहे. ते ड्रग्ज तस्करीचे मास्टर माईंड व रॅकेटचा भाग नाहीत असा दावा केला आहे.
