भविष्यात शेतकऱ्यांना मोफत बियाणे वाटप करण्याचा ‘शनेश्वर संस्थे’ चा संकल्प
उद्घाटन प्रसंगी सोयाबीन घेऊन येणाऱ्या शेतकऱ्यांचा केशव सावंत यांच्या हस्ते शाल श्रीफळ देऊन सत्कार
वाशी – नाफेड आणि महाराष्ट्र स्टेट को-ऑपरेटिव्ह मार्केटिंग फेडरेशन लिमिटेड, मुंबई यांच्या अंतर्गत शनेश्वर कृषी प्रक्रिया सहकारी संस्था मर्यादित (पारगाव) च्या वतीने पारगाव येथे शासकीय सोयाबीन खरेदी केंद्राचा मोठ्या उत्साहात शुभारंभ करण्यात आला. राज्याचे माजी मंत्री तथा आमदार तानाजीराव सावंत यांच्या नेतृत्वाखाली आणि भैरवनाथ शुगरचे व्हाईस चेअरमन केशव (विक्रम) सावंत यांच्या मार्गदर्शनाखाली हे केंद्र सुरू करण्यात आले आहे.
वाशी कृषी उत्पन्न बाजार समितीचे संचालक विकास तळेकर यांनी स्थापन केलेल्या या संस्थेच्या खरेदी केंद्राचे उद्घाटन केशव सावंत यांच्या हस्ते करण्यात आले. या प्रसंगी शिवसेना वाशी तालुका प्रमुख सत्यवान गपाट, युवा सेना जिल्हा प्रमुख बाळासाहेब मांगले, वाशी नगरपंचायतचे गटनेते नागनाथ नाईकवाडी, बाजार समितीचे सचिव वाघ साहेब, पोलीस उपनिरीक्षक घोडके, भाजपचे माजी तालुका अध्यक्ष सचिन इंगोले, नगरसेवक शिवहार स्वामी, प्रवीण गायकवाड आणि परिसरातील अनेक मान्यवर उपस्थित होते.
शेतकऱ्यांसाठी आनंदाची बातमी: मोफत बियाणे संकल्प
उद्घाटन प्रसंगी बोलताना केशव सावंत यांनी शेतकऱ्यांच्या हिताचा एक मोठा निर्णय जाहीर केला. “भविष्यात शनेश्वर कृषी प्रक्रिया सहकारी संस्थेच्या माध्यमातून गरजू शेतकऱ्यांना सोयाबीन आणि हरभरा बियाणे मोफत वाटप करण्याचा आमचा संकल्प आहे,” असे त्यांनी यावेळी स्पष्ट केले. त्यामुळे जास्तीत जास्त शेतकऱ्यांनी चांगल्या प्रतीचे सोयाबीन या खरेदी केंद्रामध्ये आणावे असे आवाहन केले.या घोषणेमुळे परिसरातून समाधान व्यक्त होत आहे.
प्रशासकीय आणि राजकीय मान्यवरांची मांदियाळी
या कार्यक्रमाला उद्धव साळवी, अशोक लाखे, विलास खवले, दिनकर शिंदे, राहुल आडुमटे, राजाभाऊ जोगदंड, सतीश गव्हाणे, तुकाराम गव्हाणे यांच्यासह शिवसेनेचे सर्व पदाधिकारी, कार्यकर्ते आणि पारगाव परिसरातील सोयाबीन उत्पादक शेतकरी मोठ्या संख्येने उपस्थित होते.नाफेडच्या माध्यमातून शेतकऱ्यांना त्यांच्या पिकाला योग्य भाव मिळणार असुन. पारगाव आणि परिसरातील शेतकऱ्यांची पायपीट थांबणार आहे. या कार्यक्रमाचे प्रास्ताविक संस्थेचे सचिव विकास तळेकर यांनी केले, तसेच आभार अशोक जाधव यांनी मानले.
