डॉ.अनंत मुगळे यांची भाजपा जिल्हास्तरीय वैद्यकीय सेल संयोजक पदी निवड.
स्थानिक स्वराज्य संस्थेमध्ये भाजपाला फटका बसण्याची शक्यता ?
धाराशिव – उमरगा शहरातील प्रसिद्ध स्त्री रोग तज्ञ डॉ.अनंत मुगळे यांची भाजपाच्या वैद्यकीय सेल जिल्हा संयोजक पदी नुकतीच निवड झाली आहे. यामुळे शिंदे सेनेसह भाजपच्या जुन्या गटाला धक्का बसला आहे. परंतु या निवडीवरून शहरासह तालुक्यात अनेक चर्चांना उधाण आले आहे. याचे मुख्य कारण म्हणजे डॉ.अनंत मुगळे हे राजकारणात सक्रिय जरी नसले तरी ते माजी खासदार रवींद्र गायकवाड व माजी आमदार ज्ञानराज चौगुले यांचे अत्यंत जवळचे निकटवर्तीय असल्याचे विख्यात आहे. ही निवड करताना भाजपच्या जुन्या गटाला विश्वासात घेतले नसल्याचे भाजपचे मूळ कार्यकर्त्यांकडून खाजगीत बोलले जात आहे. मुळात उमरगा येथील प्रसिद्ध डॉ.चंद्रकांत महाजन हे पूर्वीपासून भाजपचे सक्रिय कार्यकर्ते व नेते आहेत. जिल्हास्तरीय वैद्यकीय सेलच्या महत्त्वाच्या पदावर त्यांची निवड होणे अपेक्षित होते परंतु असे झाले नाही. या सर्व घडामोडीचा विचार करता भाजप मध्ये शह कटशह याचे राजकारण तर होत नाही ना याबाबत कुजबुज सुरू आहे.
आय.एम.ए. संघटनेतील अंतर्गत कलह व आगामी नगरपरिषद अध्यक्ष पदाचा उमेदवार..
उमरगा नगर परिषदेच्या आगामी होऊ घातलेल्या निवडणुकीसाठी उमरगा नगर परिषदेचे अध्यक्ष पद सर्वसाधारण पदासाठी जाहीर झाले आहे. या पार्श्वभूमीवर उमरगा येथील प्रसिद्ध डॉ.उदय मोरे यांचे आय.एम.ए. संघटनेतील एका गटाने नाव पुढे केले आहे. तसेच भाजपा कडून युवा नेते हर्षवर्धन चालुक्य यांचे नाव संभाव्य उमेदवार म्हणून नाव पुढे आले आहे. यांना शह देण्यासाठीच तर आय.एम.ए.संघटनेच्या एका गटाकडून व भाजपच्या एका गटाकडून अचानक पणे डॉ.अनंत मुगळे यांचे नाव पुढे आणले नाही ना याबाबतही चर्चा सुरू आहे.
डॉक्टरांना राजकीय आश्रयाची गरज भासत का आहे?
उमरगा शहर हे मागील अनेक वर्षापासून वैद्यकीय सेवा देण्यासाठी प्रसिद्ध आहे. मागील कित्येक वर्षापासून उमरगा परिसरातीलच नव्हे तर शेजारील कर्नाटक राज्यातील रुग्ण मोठ्या प्रमाणात वैद्यकीय उपचारासाठी उमरगा येथे येत असतात. उमरगा शहरातील अनेक नामांकित डॉक्टर त्यांना चांगल्या दर्जाची वैद्यकीय सेवा माफक देत असत. परंतु मागील काही वर्षापासून नवीन नवीन लोकांची या क्षेत्रात भर पडली असून त्यांच्याद्वारे वैद्यकीय सेवेचे बाजारीकरण झाले आहे. यातील काही जणांनी वैद्यकीय सेवा देताना सेवाभाव न ठेवता सामाजिक भान विसरून व्यावसायिक दृष्टिकोनातून प्रचंड माया जमवली आहे. तसेच त्यांच्या रुग्णालयात चुकीच्या उपचारामुळे रुग्णांच्या नातेवाईकांचे रुग्णालयात होणाऱ्या भांडणांचे अनेक घटना होत आहेत. विशेषतः या मंडळींकडून सामाजिक भान किंवा जाण ठेवली जात नसल्याबाबत सर्वसामान्य जनतेत या क्षेत्राविषयी कमालीची चिड निर्माण झाली आहे. त्यामुळेच कुठेतरी या लोकांना राजकीय आश्रयाची गरज भासत नाही ना असा प्रश्न निर्माण झाला आहे. मागील विधानसभा निवडणुकीतही उमरगा शहरातील वैद्यकीय सेवा देणाऱ्या काही मंडळींनी मैत्री व जातीय समीकरणाच्या आधारावर आमदार प्रवीण स्वामी यांना मदत केल्याची अनेक जण चर्चा करतात.
