धाराशिव स्थानिक गुन्हे शाखेच्या पोलीसांची कारवाई
धाराशिव – राष्ट्रीय महामार्गावर जॅक टाकून प्रवाश्यांच्या गाड्या अडवून दरोडा टाकणाऱ्या अंतरजिल्हा टोळीच्या मुसक्या आवळण्यात धाराशिव स्थानिक गुन्हे शाखेच्या पथकाला यश मिळाले आहे.
मागील काही दिवसांपासून धाराशिव जिल्ह्यात मध्यरात्री महामार्गावर वाहने थांबवून प्रवाशांना लुटण्याच्या घटनांमध्ये वाढ झाल्याचे पाहायला मिळत होते. १६ ऑक्टोबर २०२५ रोजी उमरग्याकडून सोलापूरच्या दिशेने प्रवास करणाऱ्या एका डॉक्टर परिवाराला रस्त्यावर अडवून दरोडा टाकण्यात आला होता. या घटनेनंतर संपूर्ण जिल्हा पोलीस यंत्रणा सतर्क झाली होती.
या गंभीर प्रकरणाचा तपास धाराशिव स्थानिक गुन्हे शाखेकडे सुपूर्द करण्यात आला होता. आधुनिक तांत्रिक साधनांचा वापर करून आणि पारंपरिक तपास पद्धतींचा आधार घेत या प्रकरणाचा अचूक वेध घेत अथक प्रयत्नांनंतर या टोळीतील दोन आरोपींना अटक करण्यात आली. अर्जुन बालाजी शिंदे व आशोक हिरामन शिंदे अशी अटक करण्यात आलेल्या आरोपींची नावे आहेत.
दरम्यान, चौकशीत दोन्ही आरोपींनी केलेल्या गुन्ह्याची कबुली देत आपल्या इतर चार साथीदारांसह मुरूम परिसरात तसेच जळगाव जिल्ह्यातील चाळीसगाव येथेही अशाच प्रकारचे दरोडे टाकल्याचे कबुल केले. दरोड्यात वापरण्यात आलेली XUV500 गाडी, जॅक आणि ट्रक इत्यादी साहित्य पोलीसांनी जप्त केली आहेत.
सदरील कामगिरीत सुदर्शन कासार (स.पो.नि.), शौकत पठाण, प्रकाश औताडे, जावेद काझी, शोभा बांगर, फरहान पठाण, राठोड, सुभाष चौरे, प्रकाश बोईनवाड, रत्नदीप डोंगरे, नागनाथ गुरव तसेच QRT आणि RCP पथकातील सदस्यांनी सक्रिय सहभाग नोंदवला.
