धाराशिव – धाराशिव जिल्हा परिषद निवडणुकीचे वारे वाहू लागताच तेरखेडा गटात राजकीय वातावरण चांगलेच तापले आहे. माजी जिल्हा परिषद सदस्य आणि वाशी कृषी उत्पन्न बाजार समितीचे माजी सभापती बिभीषण (अण्णा) खामकर यांनी निवडणूक लढवण्याचे जवळपास निश्चित केले असून, त्यांच्या एंट्रीमुळे स्थानिक राजकारणात खळबळ उडाली आहे. अधिकृत घोषणा नसली तरी वाशी तालुक्यात चर्चा आहे की, खामकर यावेळी राष्ट्रवादी काँग्रेस पक्षाच्या घड्याळ चिन्हावर मैदानात उतरण्याच्या तयारीत आहेत. त्यांच्या हालचाली, भेटीगाठी आणि समर्थकांचा उत्साह पाहता ही केवळ चर्चा नसून ठोस राजकीय रणनीती असल्याचे मानले जात आहे.
तेरखेडा गटात खामकर यांचा जनाधार मोठा आहे. जिल्हा परिषद सदस्य म्हणून त्यांनी केलेली विकासकामे, शेतकरीहिताचे निर्णय आणि तळागाळातील संपर्क यामुळे ते कोणत्याही उमेदवारासाठी कठीण प्रतिस्पर्धी ठरणार आहेत. त्यामुळे विद्यमान राजकीय समीकरणे कोलमडण्याची चिन्हे दिसू लागली आहेत.
दरम्यान, खामकर हे शिवसेना (शिंदे गट) पक्षात आहेत. शिंदेंच्या सेनेकडून त्यांना संधी मिळणार की डावलले जाणार? हे पाहणे महत्त्वाचे ठरणार आहे. खामकर यांना शिंदे गटाकडून संधी मिळाली नाही तर ते राष्ट्रवादीकडे वळतील अशी शक्यता वर्तवली जात आहे. मात्र, खामकर यांना आपल्याकडे वळवण्यासाठी शिंदेंची सेना प्रयत्न करतील की नाही हे पाहणे महत्वाचे ठरणार आहे. त्यामुळे, खामकर “घड्याळ” बांधतात की इतर कोणते चिन्ह स्वीकारतात, यावरच तेरखेड्याच्या निवडणुकीची दिशा ठरणार आहे. एकूणच, बिभीषण अण्णा खामकर यांच्या एंट्रीने तेरखेडा गटात निवडणूक रंगतदार होणार हे निश्चित आहे.
