धाराशिव – वाशी तालुक्यातील तेरखेडा गावाजवळ असलेल्या खामकरवाडी परिसरातील डिझायर फायर वर्क्स या फटाका निर्मिती कारखान्यात शनिवारी संध्याकाळी साडेसात ते पावणे आठ वाजेदरम्यान भीषण स्फोट होऊन आग लागल्याची घटना घडली. दैव बलवत्तर म्हणून तेरखेडा येथे आठवडी बाजार असल्याने कारखान्याला सुट्टी होती. त्यामुळे या घटनेत कोणतीही जीवितहानी झाली नाही.मात्र कारखानदाराचे लाखो रुपयांचे प्रचंड आर्थिक नुकसान झाल्याचे समजते.
वाशी तालुक्यातील तेरखेडा हे गाव फटाका उद्योगासाठी प्रसिद्ध असून मराठवाड्याची शिवकाशी’ म्हणून देखील ओळखले जाते. या परिसरात फटाके निर्मितीचे जवळपास 40 ते 50 कारखाने असून अनेक कुटुंबांची उपजीविका या उद्योगावर अवलंबून आहे.
तेरखेडा गावालगत असलेल्या खामकरवाडी शिवारात तेरखेडा येथील अहमद शेख, बिलाल शेख यांच्या मालकीचा ‘डिझायर फायरवर्क्स’ हा फटाका कारखाना आहे. शनिवारी संध्याकाळी सुमारे पावणे आठ वाजण्याच्या सुमारास कारखान्यातील एका खोलीत अचानक दोन जोरदार स्फोट झाले. या स्फोटानंतर आगीने तात्काळ उग्र रूप धारण केले. स्फोटाचा आवाज दूरपर्यंत तेरखेडा, बावी, सटवाईवाडी, खामकरवाडी, रत्नापूर,पानगाव पर्यंत दोन स्फोटाचे आवाज ऐकू गेल्याने परिसरात एकच खळबळ उडाली.
कारखान्यात फटाके तयार करण्यासाठी साठवण्यात आलेला कच्चा माल, रसायने व इतर साहित्य मोठ्या प्रमाणात जळून खाक झाले आहे. आगीमुळे कारखान्याचे संपूर्ण शेड व यंत्रसामग्रीचे मोठे नुकसान झाल्याचा प्राथमिक अंदाज व्यक्त केला जात आहे. मात्र आज बाजाराची सुट्टी असल्याने कारखान्यात एकही कामगार उपस्थित नव्हता यामुळे जिवीत हानी टळली,. आगीवर नियंत्रण मिळवण्यासाठी स्थानिकांनी स्वतः प्रयत्न केल्याचे समजते. या कारखान्यात जवळपास 40 ते 50 कामगार काम करतात. रात्री उशिरापर्यंत देखील या कारखान्यात काम सुरू असते अशी खात्रीलायक माहिती मिळाली आहे. सुरक्षेच्या दृष्टिकोनातून कोणत्याही उपाय योजना नसल्याने आगीवर नियंत्रण मिळवण्यास उशीर झाल्याने मोठे नुकसान झाले असून पुन्हा एकदा सुरक्षेच्या दृष्टिकोनाचा मुद्दा ऐरणीवर आला आहे. या कारखान्यात स्फो नेमका कशामुळे झाला आहे अद्याप देखील समजले नसून पुढील अधिक तपास सुरू आहे.
