मुख्यमंत्री एकनाथ शिंदे यांच्या दौऱ्यात धाराशिवमध्ये मविआ च्या बॅनरवरून तणाव शिवसेना (उबाठा) पक्षाची नाराजी

धाराशिव – धाराशिव शहरातील विधानसभा निवडणुकीच्या प्रचारात महाविकास आघाडीचे उमेदवार आमदार कैलास पाटील यांच्या प्रचाराचे बॅनर लावण्यात आले होते. शहरातील मुख्य रस्त्यावर, ज्ञानेश्वर मंदिर ते छत्रपती शिवाजी  महाराज चौक या भागातील स्ट्रीट लाईट पोलवर अंदाजे ४० ते ५० बॅनर लावले गेले होते. हे बॅनर लावण्यासाठी नगर पालिका आणि महावितरण विभागाकडून रीतसर परवानगी देखील घेण्यात आली होती.
        मात्र, मुख्यमंत्री एकनाथ शिंदे यांच्या आजच्या धाराशिव दौऱ्यानिमित्त नगर पालिकेने हे बॅनर हटवले, ज्यामुळे शिवसेना (उद्धव ठाकरे) पक्षाचे स्थानिक नेते संतप्त झाले. शिवसेना (उद्धव ठाकरे) पक्षाचे शहर प्रमुख सोमनाथ गुरव यांनी या घटनेबद्दल तीव्र नाराजी व्यक्त केली. त्यांनी नगर पालिकेच्या मुख्याधिकारी वसुधा फड यांना जाब विचारला आणि बॅनर का हटवण्यात आले, याची स्पष्टता मागितली. मुख्याधिकारी फड यांनी त्यावेळी  नजरचुकीने परवानगी देण्यात आल्याचे  सांगितले, मात्र गुरव यांनी या स्पष्टीकरणावर समाधान व्यक्त केले नाही.
       गुरव यांचे आरोप होते की, मुख्यमंत्री शिंदे यांच्या दौऱ्यानिमित्त महायुतीतील स्थानिक नेत्यांच्या दबावामुळेच हे बॅनर हटवण्यात आले. त्यांनी हा निर्णय राजकीय दबावामुळे घेतला असल्याचे सांगत नगर पालिकेवर गंभीर आरोप केले. त्यांनी यासंदर्भात विधान केले की, “लोकसभा निवडणुकीवेळी पंतप्रधान नरेंद्र मोदी धाराशिवमध्ये येऊनही, शिवसेना (उद्धव ठाकरे) पक्षाचे उमेदवार ओमराजे निंबाळकर विजयी झाले होते. आता मुख्यमंत्री येवो, पंतप्रधान येवो, कुणीही येवो, यावेळीही महाविकास आघाडीचे उमेदवार आमदार कैलास पाटील दणदणीत मतांनी विजयी होणार”
        विशेष म्हणजे, सोमनाथ गुरव यांनी नगर पालिकेने हटवलेले बॅनर पुन्हा लावले. यावेळी मुख्यमंत्री शिंदे सभा संपवून हेलिपॅडकडे जात होते, आणि त्यांनी हे बॅनर पाहिले. यामुळे शिवसेना (उद्धव ठाकरे) पक्षाचे नेते अधिकच ठाम झाले असून, त्यांच्या मते हे बॅनर हटवण्यामागे राजकीय षड्यंत्र होते.
        या घटनेमुळे धाराशिव शहरात निवडणुकीच्या वातावरणात तणाव निर्माण झाला आहे. शिवसेना (उद्धव ठाकरे) पक्षाचे स्थानिक नेते या घटनेवरून नाराज आहेत आणि त्यांनी आपल्या उमेदवाराचा प्रचार थांबणार नसल्याचे स्पष्ट केले आहे.