धाराशिव – धाराशिव जिल्हा परिषद निवडणुकीच्या रणधुमाळीला सुरुवात होत असतानाच तेरखेडा जिल्हा परिषद गटात मोठी राजकीय उलथापालथ पाहायला मिळाली आहे. माजी आमदार राहुल मोटे यांचे अत्यंत विश्वासू सहकारी मानले जाणारे बालाजी घोलप यांनी शिवसेनेत जाहीर प्रवेश करत मोटे यांची साथ सोडली आहे. या घडामोडीमुळे तेरखेडा परिसरातील राजकीय समीकरणे बदलण्याची शक्यता व्यक्त केली जात आहे.
बालाजी घोलप यांनी शिवसेना नेते राजन साळवी आणि माजी मंत्री तथा आमदार तानाजी सावंत यांच्या उपस्थितीत शिवसेना (शिंदे गट) पक्षात अधिकृत प्रवेश केला. शिवसेनेच्या स्थानिक कार्यकर्त्यांनी घोलप यांचे स्वागत केले. यावेळी उपस्थित नेत्यांनी घोलप यांच्या प्रवेशामुळे शिवसेना अधिक मजबूत होईल, असा विश्वास व्यक्त केला. तेरखेडा गटातील अनेक ग्रामपंचायतींमध्ये घोलप यांचा थेट संपर्क असल्याने ऐन निवडणुकीच्या तोंडावर त्यांनी घेतलेला हा निर्णय राहुल मोटे यांच्यासाठी मोठा धक्का मानला जात आहे. स्थानिक पातळीवर मोटे समर्थकांमध्येही यामुळे अस्वस्थता पसरल्याचे दिसून येत आहे.
बालाजी घोलप हे केवळ राजकीय कार्यकर्ते नसून युवा नेतृत्व आणि उद्योजक म्हणूनही ओळखले जातात. तेरखेडा परिसरातील तरुण वर्गामध्ये त्यांची चांगली पकड आहे. विविध सामाजिक उपक्रम, क्रीडा स्पर्धा आणि युवकांच्या प्रश्नांवर त्यांनी सातत्याने भूमिका घेतली आहे. त्यामुळे त्यांचा शिवसेना प्रवेश पक्षासाठीही फायद्याचा ठरू शकतो, असे बोलले जात आहे.
दरम्यान, या प्रवेशामुळे तेरखेडा जिल्हा परिषद गटातील निवडणूक चुरशीची होण्याची चिन्हे आहेत. राहुल मोटे यांना आपली राजकीय रणनीती नव्याने आखावी लागणार असल्याचे राजकीय विश्लेषकांचे मत आहे. आगामी काळात आणखी काही स्थानिक नेते पक्षबदल करतील का, याकडे सर्वांचे लक्ष लागले आहे. एकूणच, जिल्हा परिषद निवडणुकीच्या तोंडावर झालेल्या या राजकीय घडामोडीने तेरखेडा परिसरामध्ये चर्चेला उधाण आले आहे. या प्रवेशावेळी भैरवनाथ शुगर चे चेअरमन केशव सावंत, शिवसेना तालुकाप्रमुख सत्यवान गपाट, जिल्हा परिषदेचे माजी सदस्य उद्धव साळवे, तेरखेडा गावचे उपसरपंच फरीद पठाण, विकी चव्हाण, अच्युत शिंदे, सोहम सरवदे, अक्षय चव्हाण, नितीन घुले, संदीप देशमुख, दिनेश मुळे तसेच शिवसैनिक व कार्यकर्ते मोठ्या संख्येने उपस्थित होते.
