धाराशिव – राज्यात शिवसेना व राष्ट्रवादी काँग्रेस पक्षात फूट पडली आणि दोन शिवसेना पक्ष आणि राष्ट्रवादी काँग्रेस पक्ष निर्माण झाले. शिवसेना ठाकरे गट आणि राष्ट्रवादी अजित पवार गट व राष्ट्रवादी शरद पवार गट असे एकाच पक्षांचे दोन गट तयार झाले. दोन्ही पक्षातील एक गट सत्तेत तर एक गट विरोधात. हे दोन्ही एकमेकांचे विरोधक बनल्याचं संपूर्ण राज्याने पाहिलं.
दोन्ही राष्ट्रवादी एकच असल्याचं शिवसेना शिंदे गटाचे माजी मंत्री आमदार तानाजी सावंत यांनी भर सभेत बोलून दाखवलं. आता याचाच प्रत्यय कळंब मधील नगरपालिकेच्या निवडणुकीमध्ये जिल्हावासीयांना आला आहे. राष्ट्रवादी शरद पवार गटाचे कळंब तालुकाध्यक्ष श्रीधर भवर हे आहेत. कळंब नगराध्यक्ष पदाचे आरक्षण हे सर्व साधारण महिलेसाठी आरक्षित झाल्याने श्रीधर भवर यांच्या पत्नी मीनाक्षी भवर यांना राष्ट्रवादी अजित पवार यांच्या गटाकडून उमेदवारी देण्यात आल्याने राजकीय वर्तुळामध्ये एकच चर्चा सुरू आहे. विशेष म्हणजे मीनाक्षी भवर यांनी शेयर केलेल्या फोटोवर घड्याळ चिन्हासह तुतारी या चिन्हाचा फोटो त्याचबरोबर शरद पवार आणि अजित पवार या दोघांचे देखील फोटो असल्याने अनेकांच्या भुवया उंचावल्या आहेत.
राष्ट्रवादी अजित पवार गटाकडून मीनाक्षी भवर यांना घड्याळ या चिन्हावर एबी फॉर्म देण्यात आल्याने पती शरद पवार गटाचे तालुकाध्यक्ष तर पत्नी अजित पवार गटाच्या अधिकृत उमेदवार झाल्या. त्यामुळे दोन्ही राष्ट्रवादी एकच आहेत अशी चर्चा धाराशिव च्या राजकारणात होऊ लागली आहे.
