धाराशिव – धाराशिव नगराध्यक्ष पदाच्या निवडणुकीत शिवसेना (उबाठा) व काँग्रेस पार्टी यांची आघाडी आणि महायुती दोन्ही आघाडीतील नगराध्यक्ष पदाचा उमेदवार अखेर ठरला आहे. अनेक इच्छुकांच्या चढाओढीतून वरिष्ठांनी तोडगा काढल्यानंतर दोन्ही बाजूंच्या गटाकडून नगराध्यक्ष पदाच्या उमेदवारांवर शिक्कामोर्तब करण्यात आल्याची माहिती आहे.
शिवसेना व काँग्रेस यांच्या आघाडी मधून शिवसेने (उबाठा गट) कडून संगीता सोमनाथ गुरव यांचे नाव निश्चित झाले आहे तर महायुतीमधून भाजप कडून नेहा राहुल काकडे यांना संधी मिळाली आहे. इच्छुकांची मनधरणी तसेच समजूत काढण्यात प्रमुख नेत्यांना वरिष्ठ नेते मंडळींना यश आल्याने नगराध्यक्ष पदांच्या उमेदवारांवर शिक्का मोर्तब करण्यात आले.
धाराशिव नगरपालिकेची निवडणूक ही मुख्यतः भाजप व शिवसेना (उबाठा) यांच्यात होणार असून ठाकरे गटाचे खासदार ओम राजेनिंबाळकर व आमदार कैलास पाटील व भाजपचे तुळजापूर चे आमदार राणाजगजितसिंह पाटील यांच्यासाठी प्रतिष्ठेची होणार आहे. तसेच नऊ वर्षांनंतर ही निवडणूक होणार असल्याने नगरपालिकेवर आपलेच वर्चस्व राखण्यासाठी दोन्ही आघाड्यांकडून जीवाचे रान करण्यात येणार असल्याची चर्चा राजकीय वर्तुळात रंगली आहे
कोण आहेत शिवसेना-काँग्रेस आघाडीच्या नगराध्यक्ष पदाच्या उमेदवार?
शिवसेना व काँग्रेस यांच्या आघाडी कडून संगीता सोमनाथ गुरव यांचं नाव निश्चित झालं आहे. संगीता गुरव ह्या ठाकरे गटाचे माजी नगरसेवक व शिवसेना शहर प्रमुख सोमनाथ गुरव यांच्या पत्नी आहेत.
कोण आहेत महायुतीच्या नगराध्यक्ष पदाच्या उमेदवार?
महायुतीकडून नेहा राहुल काकडे यांच्या नावावर शिक्कमोर्तब झाले आहे. नेहा काकडे ह्या भाजपचे माजी नगरसेवक तथा भारतीय जनता युवा मोर्चाचे जिल्हाध्यक्ष राहुल काकडे यांच्या पत्नी आहेत.
