गेल्या पाच दिवसांत हजारो कार्यकर्त्यांचा केला ठाकरे गटात पक्षप्रवेश
धाराशिव – स्थानिक स्वराज्य संस्थेच्या निवडणुकीच्या पार्श्वभूमीवर आरक्षण जाहीर झाले आहे. इच्छुकांनी गर्दी करत मोर्चे बांधणीला सुरुवात केली आहे. अनेकांनी आपल्या भागातून निवडणूक लढवण्यासाठी तयारी दाखवत त्या दिशेने वाटचाल देखील सुरू केली आहे. इच्छुकांनी निवडणुकीमध्ये संधी मिळावी यासाठी लगबग सुरू केली असून आपल्यालाच संधी मिळावी यासाठी चाचणी देखील सुरू केली आहे. याच पार्श्वभूमीवर “आयाराम – गयाराम” यांची देखील वेगवेगळ्या पक्षांमध्ये पक्षप्रवेश सुरू झाले आहेत.
धाराशिव कळंब मतदार संघाचे आमदार तथा शिवसेना ठाकरे गटाचे जिल्हाप्रमुख कैलास घाडगे-पाटील यांच्या नेतृत्वात ठाकरे गटांमध्ये सध्या जोरदार इनकमिंग सुरू असल्याचे पाहायला मिळत आहे. विविध राजकीय पक्ष तसेच वेगवेगळ्या संघटनातून मोठ्या प्रमाणात कार्यकर्ते ठाकरे गटामध्ये प्रवेश करत असल्याचे पाहायला मिळत आहे. आमदार कैलास पाटील यांच्या नेतृत्वात गेल्या पाच दिवसात हजारो कार्यकर्त्यांचा ठाकरे गटामध्ये प्रवेश झाला असून येत्या काळात देखील मोठ्या प्रमाणात वेगवेगळ्या पक्षातून तसेच संघटनातून मोठ्या संख्येने पदाधिकारी व कार्यकर्ते हे शिवसेना ठाकरे गटामध्ये पक्ष प्रवेश करणार आहेत.
आगामी होणाऱ्या स्थानिक स्वराज्य संस्थेच्या निवडणुकीच्या पार्श्वभूमीवर हे पक्षप्रवेश महत्त्वपूर्ण ठरणार असल्याचे बोलले जात आहे. हे पक्षप्रवेश झाल्याने आपली ताकद येणाऱ्या निवडणुकांमध्ये विरोधकांना नक्कीच दाखवून देणार असल्याचे या पक्षप्रवेश सोहळ्यांमधून दाखवून दिले जात असल्याची राजकीय वर्तुळात जोरदार चर्चा सध्या सुरू आहे.
आमदार तथा शिवसेना जिल्हाप्रमुख कैलास पाटील यांनी पक्षाने दिलेल्या जबाबदारीवर खरे उतरत शिवसेनेमध्ये पक्षप्रवेशांचा धडाका सुरू ठेवल्याने येणाऱ्या काळामध्ये कोणकोणत्या पक्षांमधून पदाधिकारी व कार्यकर्ते हे शिवसेना ठाकरे गटामध्ये प्रवेश करतील हे पाहणे औत्सुक्याचे ठरणार आहे.
